ٹرمپ کا ایران کیلئے فوجی وارننگ: دوسرا بحری بیڑہ روانہ

واشنگٹن (ڈیلی اردو) امریکی صدر ڈونلڈ ٹرمپ نے خبردار کیا ہے کہ اگر ایران کے ساتھ مذاکرات ناکام ہوئے تو مشرقِ وسطیٰ میں فوجی تیاری کے طور پر دوسرا بحری بیڑہ روانہ کر دیا گیا ہے، جو اس وقت خطے کی جانب بڑھ رہا ہے۔

امریکی میڈیا کو دیے گئے انٹرویو میں صدر ٹرمپ نے کہا کہ امریکا اور ایران کے درمیان مذاکرات کا دوسرا دور آئندہ ہفتے متوقع ہے۔ ان کا کہنا تھا کہ ایران اس بار سنجیدگی سے بات چیت کر رہا ہے کیونکہ اسے امریکی فوجی طاقت کا اندازہ ہو چکا ہے اور وہ معاہدہ کرنا چاہتا ہے۔

صدر ٹرمپ نے جون میں ایرانی جوہری تنصیبات پر حملوں کا حوالہ دیتے ہوئے کہا کہ ماضی میں ایران نے مذاکرات کو سنجیدہ نہیں لیا اور حد سے زیادہ اعتماد کا مظاہرہ کیا، جس کے بعد اسے نتائج کا سامنا کرنا پڑا۔ تاہم ان کے بقول اس بار مذاکرات کی نوعیت مختلف ہے۔

انہوں نے مزید کہا کہ اگر معاہدہ طے نہ پایا تو امریکا کو انتہائی سخت اقدامات کرنا ہوں گے۔ امریکی میڈیا کے مطابق ایک امریکی عہدیدار نے مشرقِ وسطیٰ میں دوسرا ایئرکرافٹ کیریئر اسٹرائیک گروپ بھیجنے پر مشاورت کی تصدیق کی ہے۔

اس وقت خطے میں یو ایس ایس ابراہم لنکن اور اس کا اسٹرائیک گروپ موجود ہے، جس میں جنگی طیارے، ٹوماہاک میزائل اور متعدد جنگی جہاز شامل ہیں۔ 

غزہ جنگ کے دوران بھی امریکا نے طویل عرصے تک خطے میں دو طیارہ بردار بحری جہاز تعینات کیے رکھے تھے۔