ٹرمپ کا ایران کے شہری انفراسٹرکچر اور جزیرہ خارک کو نشانہ بنانے کا عندیہ

واشنگٹن (ڈیلی اردو) امریکی صدر ڈونلڈ ٹرمپ نے ایران کے شہری بنیادی ڈھانچے کو نشانہ بنانے سے متعلق اپنی سابقہ دھمکیوں کا اعادہ کرتے ہوئے ایران کے بجلی گھروں، سمندری پانی کو میٹھا کرنے والے پلانٹس اور جزیرہ خارک پر ممکنہ کارروائی کا اشارہ دیا ہے۔

جزیرہ خارک ایران کے لیے انتہائی اہم تیل برآمدی مرکز ہے، جہاں سے ملک کی تقریباً 90 فیصد تیل برآمدات کی ترسیل کی جاتی ہیں۔

دوسری جانب مستقل جنگ بندی کے لیے جاری سفارتی کوششوں کے دوران ایرانی پارلیمنٹ کے اسپیکر محمد باقر قالیباف نے امریکی صدر کے بیانات پر سخت ردعمل ظاہر کیا ہے۔

قالیباف نے سوشل میڈیا پلیٹ فارم ایکس پر اپنے بیان میں کہا کہ ایران کسی بھی دباؤ کے سامنے نہیں جھکے گا اور ملک اپنے مفادات کا دفاع جاری رکھے گا۔

ادھر ایران کے وزیر خارجہ عباس عراقچی نے بتایا کہ انہوں نے سعودی عرب، ترکی اور عمان کے وزرائے خارجہ کے علاوہ پاکستان کے آرمی چیف فیلڈ مارشل سید عاصم منیر سے بھی ٹیلی فونک رابطہ کیا ہے۔

عراقچی کے مطابق ان رابطوں کا مقصد خطے میں کشیدگی کم کرنے اور جنگ کے خاتمے کے لیے جاری سفارتی کوششوں کو آگے بڑھانا ہے۔ فیلڈ مارشل عاصم منیر بھی ایران اور امریکہ کے درمیان ثالثی کی کوششوں میں اہم کردار ادا کر رہے ہیں۔

امریکی صدر ڈونلڈ ٹرمپ نے بدھ کے روز کہا تھا کہ عبوری جنگ بندی کا معاہدہ "ختم ہو چکا ہے"، تاہم انہوں نے کہا کہ مذاکرات جاری رہنے دیے جائیں گے، اگرچہ ان کے بقول مذاکرات کار "اپنا وقت ضائع کر رہے ہیں"۔

ایرانی سپریم لیڈر آیت اللہ علی خامنہ ای کی تدفین کے بعد مستقل معاہدے کے لیے باضابطہ مذاکرات شروع ہونا تھے۔

ان مذاکرات میں کئی اہم اور پیچیدہ معاملات زیرِ بحث آنے کا امکان ہے، جن میں آبنائے ہرمز کو مکمل طور پر دوبارہ کھولنا، عالمی بحری نقل و حمل کی بحالی اور ایران کے متنازع جوہری پروگرام پر پابندیاں شامل ہیں۔