پاراچنار: گل سکینہ قتل کیس، 6 مشتبہ افراد گرفتار

پاراچنار (محمد صادق) خیبر پختونخوا کے قبائلی ضلع کرم کے سرحدی علاقے پیواڑ میں زیادتی کا نشانہ بننے کے بعد قتل ہونے والی پانچ سالہ طالبہ گل سکینہ قتل کیس میں مزید چھ افراد کو گرفتار کرلیا گیا ہے اور ڈی این اے کے نمونے لیبارٹری ٹیسٹ کیلئے لاہور بھجوا دیئے گئے ہیں۔

ڈی پی او ضلع کرم رحیم شاہ کے مطابق پاراچنار کے سرحدی گاؤں پیواڑ غنڈیخیل میں زیادتی کا نشانہ بننے اور قتل ہونے والی پانچ سالہ طالبہ گل سکینہ قتل کیس میں مزید چھ مشتبہ افراد گرفتار کر لیے گئے ہیں اور گرفتار افراد کی تعداد آٹھ ہو گئی ہے جن سے تحقیقات جاری ہیں اور ڈی این اے کے نمونے لیبارٹری ٹیسٹ کیلئے لاہور بھجوا دئیے گئے ہیں اور جلد حقائق منظر عام پر آنے کی توقع ہے۔

دوسری جانب پاک فوج 73 بریگیڈ کے کمانڈر بریگیڈیئر نجف عباس اور کمانڈنگ آفیسر کرنل محمد جاوید الیاس اعوان نے بھی سرحدی علاقے پیواڑ کا دورہ کیا ہے مقتول بچی کے خاندان کے افراد اور متعلقہ سکول کے عملے سے ضروری معلومات اکھٹے کئے۔ اس موقع پر فورسز کے افسران کا کہنا تھا کہ معصوم بچی کے قتل میں ملوث عناصر سزا سے نہیں بچ سکتے اور اس قسم واقعات کی روک تھام کے لئے تعلیمی اداروں سمیت منصوبہ بندی کی جارہی ہے۔

گذشتہ دنوں ضلع کرم کے سرحدی علاقے پیواڑ غنڈیخیل میں سرکاری سکول کے پانچ سالہ طالبہ گل سکینہ کو زیادتی کا نشانہ بنانے کے بعد قتل کردیا گیا تھا اور پانی میں ڈوبنے سے مرنے کا ڈرامہ رچانے کیلئے بچی کی لاش کو چھوٹے سے تالاب میں پھینک دی گئی تھی۔ رشتہ داروں کے کئی گھنٹے تلاش کے بعد لاش کو پانی کے تالاب سے نکال دیا گیا۔ بعد ازاں میڈیکل رپورٹ سے پتہ چلا کہ بچی کو زیادتی کا نشانہ بنانے کے بعد قتل کردیا گیا ہے۔