پاسداران انقلاب دہشت گرد قرار: ایران نے یورپی سفیروں کو طلب کر لیا

تہران (ڈیلی اردو) ایران نے پیر کے روز کہا کہ یورپی یونین کی جانب سے پاسداران انقلاب کو دہشت گرد تنظیم قرار دینے کے بعد اس نے تہران میں تعینات یورپی سفیروں کو طلب کر لیا ہے۔

ایرانی وزارتِ خارجہ کے ترجمان اسماعیل بقائی نے کہا، ’’یورپی یونین کے تمام رکن ممالک کے نمائندے جن کے تہران میں سفارت خانے ہیں، وزارتِ خارجہ میں طلب کیے گئے‘‘۔ انہوں نے مزید کہا کہ’’یہ آئندہ اقدامات سے پہلے سب سے ہلکا ردِعمل ہے۔‘‘ 

خیال رہے گزشتہ ہفتے یورپی یونین نے ایران میں ملک گیر احتجاج کے دوران خونریز کریک ڈاؤن میں کردار کے باعث ایران کے پاسدارانِ انقلاب کو دہشت گرد گروپوں کی فہرست میں شامل کیا تھا۔ ان مظاہروں میں اطلاعات کے مطابق ہزاروں افراد ہلاک اور دسیوں ہزار گرفتار ہوئے تھے۔

امریکہ اور کینیڈا سمیت دیگر ممالک پہلے ہی پاسدارانِ انقلاب کو دہشت گرد تنظیم قرار دے چکے ہیں۔ اگرچہ یہ اقدام بڑی حد تک علامتی ہے، تاہم اس سے ایران پر معاشی دباؤ میں اضافہ ہوتا ہے، بالخصوص اس لیے کہ پاسدارانِ انقلاب ملک کی معیشت میں بڑا اثر و رسوخ رکھتے ہیں۔

پاسداران انقلاب، جو ایران کے بیلسٹک میزائلوں کا کنٹرول بھی رکھتے ہیں، صرف سپریم لیڈر آیت اللہ علی خامنہ ای کو جواب دہ ہیں۔

دریں اثنا اتوار یکم فروری کو ایران کے پارلیمانی اسپیکر نے کہا کہ 2019ء کے ایک قانون کے تحت اسلامی جمہوریہ ایران اب یورپی یونین کی تمام افواج کو دہشت گرد تنظیمیں سمجھتی ہے۔