پاک-افغان سرحد پر جھڑپیں: ہلاکتوں کے متضاد دعوے

اسلام آباد (ڈیلی اردو) پاکستان کا کہنا ہے کہ حالیہ سرحدی جھڑپوں میں افغان طالبان کے 133 جنگجو ہلاک کیے گئے۔

دوسری جانب افغان طالبان نے دعویٰ کیا ہے کہ ان کی کارروائیوں میں پاکستانی فوج کے 55 اہلکار ہلاک ہوئے۔

پاکستانی فضائیہ کی کارروائی: کابل، قندھار اور پکتیا میں اہم ملٹری تنصیبات تباہ

پاکستان کے سرکاری نیوز چینل پی ٹی وی نیوز کے مطابق پاکستانی فضائیہ نے مؤثر کارروائی کرتے ہوئے کابل، قندھار اور پکتیا میں اہم ملٹری تنصیبات کو نشانہ بنایا۔

ذرائع کا کہنا ہے کہ کابل میں دو بریگیڈ ہیڈکوارٹر تباہ کیے گئے۔

مزید بتایا گیا ہے کہ قندھار میں ایک کور ہیڈکوارٹر، ایک بریگیڈ ہیڈکوارٹر، ایمونیشن ڈپو اور لاجسٹک بیس کو تباہ کیا گیا۔

سیکیورٹی ذرائع کے مطابق پکتیا میں بھی ایک کور ہیڈکوارٹر کو نشانہ بنا کر تباہ کر دیا گیا۔

ان دعوؤں کی آزاد ذرائع سے تصدیق نہیں ہو سکی۔