پاک افغان سرحد پر شدید جھڑپ، کرم سیکٹر میں بھاری ہتھیاروں کا استعمال

پشاور (نمائندہ ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع کرم میں پاک افغان سرحد پر ہفتے کے روز کشیدگی اس وقت بڑھ گئی جب سکیورٹی ذرائع کے مطابق افغانستان کی جانب سے اسپینہ شگہ، بگن اور دیگر ملحقہ سرحدی علاقوں میں پاکستانی چوکیوں پر مبینہ طور پر بلااشتعال فائرنگ کی گئی، جس کے بعد پاکستانی سکیورٹی فورسز نے مؤثر جوابی کارروائی کی۔

سکیورٹی ذرائع کے مطابق افغان طالبان کی جانب سے پاکستانی سرحدی چوکیوں کو بھاری ہتھیاروں، مارٹر گولوں اور خودکار اسلحے سے نشانہ بنایا گیا۔ فائرنگ کے بعد پاکستانی فورسز نے فوری ردعمل دیتے ہوئے سرحد پار موجود فائرنگ کے مبینہ ذرائع کو نشانہ بنایا۔

ذرائع کا کہنا ہے کہ جوابی کارروائی کے دوران پاکستانی فورسز نے چھوٹے اور بڑے ہتھیاروں کے علاوہ توپ خانے کا بھی استعمال کیا اور سرحد پار موجود متعدد سرحدی پوسٹوں، مارٹر پوزیشنز اور دفاعی چوکیوں کو نشانہ بنایا۔

سکیورٹی ذرائع کے مطابق دونوں جانب سے کچھ دیر تک شدید فائرنگ کا تبادلہ جاری رہا، جس میں بھاری اور خودکار ہتھیار استعمال کیے گئے۔ ذرائع نے دعویٰ کیا کہ پاکستانی فورسز کی کارروائی کے نتیجے میں افغان جانب موجود متعدد اہلکار اپنی سرحدی پوسٹیں چھوڑنے پر مجبور ہو گئے۔

تاحال دونوں جانب کسی جانی نقصان یا زخمیوں کی سرکاری تصدیق سامنے نہیں آئی، جبکہ افغان حکام نے بھی واقعے پر فوری طور پر کوئی بیان جاری نہیں کیا۔

حکام کے مطابق سرحدی علاقوں میں صورتحال پر مسلسل نظر رکھی جا رہی ہے اور پاکستانی فورسز اپنی دفاعی پوزیشنوں پر موجود ہیں۔ واقعے کے بعد علاقے میں کشیدگی برقرار ہے۔

نوٹ: خبر میں شامل بعض دعوے سکیورٹی ذرائع کے حوالے سے ہیں اور ان کی آزاد ذرائع سے تصدیق نہیں ہو سکی ہے۔