پاک بھارت جنگ: “ہم مداخلت نہیں کریں گے!”امریکہ کا دوٹوک اعلان

واشنگٹن (ڈیلی اردو) امریکہ کے نائب صدر جے ڈی وینس نے کہا ہے کہ امریکہ کسی ایسی جنگ میں مداخلت نہیں کرے گا جس سے اس کا براہ راست تعلق نہ ہو۔ انہوں نے پاک-بھارت کشیدگی پر تبصرہ کرتے ہوئے واضح کیا کہ امریکہ اس تنازع کا فریق نہیں بنے گا، تاہم سفارتی ذرائع سے کشیدگی کم کرانے کی کوشش ضرور کرے گا۔

امریکی نشریاتی ادارے فوکس نیوز کو دیے گئے ایک انٹرویو میں جے ڈی وینس نے کہا: “ہم دونوں ممالک کی جنگ میں مداخلت نہیں کر سکتے، البتہ امریکہ سفارتکاری کا راستہ اختیار کرسکتا ہے۔”

امریکی صلاحیتوں کے حوالے سے ایک سوال پر انہوں نے کہا کہ واشنگٹن یہ کوشش کرے گا کہ بھارت اور پاکستان دونوں تحمل کا مظاہرہ کریں۔ “انڈیا نے حملہ کیا، پاکستان نے جواب دیا، دونوں ممالک کو ٹھنڈے دماغ سے سوچنا چاہیے۔ پاک-انڈیا جنگ ایٹمی جنگ نہیں بننی چاہیے، اگر ایسا ہوا تو بہت نقصان ہوگا۔”

انہوں نے مزید کہا، “امریکہ انڈیا کو ہتھیار ڈالنے کے لئے نہیں کہہ سکتا، اور نہ ہی پاکستانیوں کو ایسا کرنے کو کہہ سکتے ہیں۔ ہم اس تنازع کا حل سفارت کاری کے ذریعے چاہتے ہیں۔”

جے ڈی وینس نے اس بات پر زور دیا کہ امریکہ کو پاک-بھارت تنازع پر تشویش ہے اور وہ چاہتا ہے کہ یہ معاملہ جلد از جلد حل ہو۔ ان کا کہنا تھا: “سفارتی ذرائع سے ہماری امید اور توقع یہ ہے کہ یہ تنازع جوہری جنگ میں تبدیل نہیں ہوگا، اور فی الحال ایسا لگ بھی نہیں رہا۔”

واضح رہے کہ جمعرات کے روز امریکہ کے وزیر خارجہ مارکو روبیو نے پاکستان کے وزیر اعظم شہباز شریف سے ٹیلیفونک رابطہ کیا۔ وزیر اعظم ہاؤس کے مطابق مارکو روبیو نے کہا کہ امریکہ جنوبی ایشیا کی صورتحال پر گہری نظر رکھے ہوئے ہے اور خطے میں امن و استحکام کے لیے پرعزم ہے۔

امریکی وزیر خارجہ نے دونوں ممالک پر زور دیا کہ وہ کشیدگی کم کرنے کے لیے مشترکہ طور پر اقدامات کریں۔