پاکستان: اسلام آباد میں موٹر سائیکل سواروں کی فائرنگ سے پولیس افسر ہلاک

اسلام آباد (نمائندہ ڈیلی اردو) پاکستان کے وفاقی دارالحکومت اسلام آباد میں نامعلوم موٹر سائیکل سواروں کی فائرنگ سے پولیس افسر ہلاک ہو گیا ہے۔

فائرنگ کا یہ واقعہ شہزاد ٹاؤن میں پیش آیا، پولیس ذرائع کے مطابق حیدر شاہ کو انکے گھر کے قریب ٹارگٹ کلنگ کا نشانہ بنایا گیا اور حملہ آور فرار ہونے میں کامیاب ہوگئے۔

ترجمان اسلام آباد پولیس کے مطابق واقعہ جھنگی سیداں میں پیش آیا، جہاں نامعلوم موٹرسائیکل سواروں نے پولیس پر فائرنگ کردی، فائرنگ کی زد میں آکر سب انسپکٹر حیدر علی شاہ شدید زخمی ہوگیا، زخمی سب انسپکٹر کو پمز ہسپتال منتقل کردیا گیا جہاں وہ جانبر نہ ہوا اور جان کی بازی ہار گیا۔

پولیس نے مزید بتایا کہ ہلاک ہونے والا سب انسپکٹر حیدر علی شاہ تھانہ انڈسٹریل ایریا میں تعینات تھا۔

اسلام آباد پولیس نے فوری طور پر ملزمان کی گرفتاری کے لیے خصوصی ٹیمیں تشکیل دے دی ہیں، واقعے کی مختلف زاویوں سے تفتیش کی جارہی ہے۔