پاکستان اور بنگلہ دیش کے درمیان 15 سال بعد مذاکرات بحال

اسلام آباد + ڈھاکا (ڈیلی اردو/نیوز ایجنسیاں) پاکستان اور بنگلہ دیش کے درمیان 15 سال کے طویل تعطل کے بعد خارجہ سیکریٹری سطح کے مشاورتی مذاکرات (Foreign Secretary-Level Consultations) کا چھٹا دور ڈھاکا میں منعقد ہوا، جس میں دو طرفہ تعلقات کے تمام پہلوؤں پر جامع تبادلہ خیال کیا گیا۔

ڈھاکا کے اسٹیٹ گیسٹ ہاؤس پدما میں ہونے والے اجلاس میں پاکستان کی سیکریٹری خارجہ آمنہ بلوچ نے وفد کے ہمراہ شرکت کی، جبکہ بنگلہ دیشی وفد کی قیادت سیکریٹری خارجہ محمد جاشم الدین نے کی۔

مذاکرات خوشگوار ماحول میں ہوئے جن میں تجارتی تعلقات، علاقائی صورتحال، دو طرفہ تعاون کے فروغ اور نئے امکانات کا جائزہ لیا گیا۔ دونوں فریقین نے باہمی دلچسپی کے مختلف امور پر تفصیل سے گفتگو کی۔

بنگلہ دیشی میڈیا کے مطابق پاکستان میں بنگلہ دیش کے ہائی کمشنر اقبال حسین نے بتایا کہ پاکستان برآمدات میں اضافے کا خواہاں ہے، بالخصوص کپاس، چینی، چاول اور گندم جیسی مصنوعات کی تجارت میں اگر قیمتیں متوازن ہوں۔

ملاقات کے بعد آمنہ بلوچ نے بنگلہ دیش کے چیف ایڈوائزر ڈاکٹر محمد یونس سے بھی ملاقات کی، جس میں تجارت، سرمایہ کاری، نوجوانوں کے روابط، علاقائی تعاون اور سارک کی بحالی پر تبادلہ خیال ہوا۔ ڈاکٹر یونس نے دونوں ممالک کے تعلقات کے حوالے سے اپنا وژن پیش کیا، جس پر آمنہ بلوچ نے پاکستانی قیادت کی نیک تمنائیں پہنچائیں۔

بعد ازاں، سیکریٹری خارجہ نے بنگلہ دیش کے امور خارجہ کے مشیر توحید حسین سے بھی ملاقات کی، جس میں علاقائی امور اور دو طرفہ تجارت و معیشت پر بات چیت کی گئی۔ ان کی ڈھاکا میں مختلف تھنک ٹینکس سے ملاقاتیں بھی طے ہیں۔

واضح رہے کہ رواں ماہ کے اختتام پر پاکستان کے نائب وزیراعظم اور وزیر خارجہ اسحٰق ڈار بھی سرکاری دورے پر بنگلہ دیش جائیں گے۔

مشاورتی مذاکرات کا ساتواں دور 2026 میں اسلام آباد میں منعقد ہوگا۔