پاکستان فضائیہ نے پانچ بھارتی طیارے مار گرائے ہیں: وزیر دفاع خواجہ آصف

اسلام آباد (ڈیلی اردو رپورٹ) پاکستان کے وزیر دفاع خواجہ محمد آصف نے انکشاف کیا ہے کہ بھارتی فضائی حملوں کے بعد پاکستان نے بھرپور جوابی کارروائی کرتے ہوئے پانچ بھارتی جنگی طیارے مار گرائے ہیں جبکہ تین یو اے ویز (ڈرونز) بھی تباہ کیے گئے ہیں۔

خواجہ آصف نے امریکی نشریاتی ادارے بلومبرگ کو دیے گئے ایک انٹرویو میں کہا ہے کہ بھارت کی جانب سے پاکستان اور آزاد کشمیر میں سات مختلف مقامات پر حملے کیے گئے، جنہیں بھارت دہشتگردوں کی پناہ گاہیں قرار دے رہا ہے۔ تاہم انہوں نے ان دعوؤں کو سختی سے مسترد کرتے ہوئے کہا کہ ان حملوں کا نشانہ عام شہری اور عبادت گاہیں بنیں۔

وزیر دفاع کا کہنا تھا: “ہم نے لائن آف کنٹرول پر دو بھارتی چیک پوسٹس کو نشانہ بنا کر تباہ کیا ہے اور کچھ بھارتی فوجیوں کو قیدی بھی بنایا گیا ہے۔ بھارت کی یہ جارحیت بین الاقوامی قوانین کی کھلی خلاف ورزی ہے اور پاکستان نے اس کا مؤثر جواب دیا ہے۔”

انہوں نے مزید کہا کہ بھارت کا یہ تاثر دینا کہ نشانہ صرف دہشتگردوں کے ٹھکانے تھے، سراسر جھوٹ اور پروپیگنڈا ہے۔
“میں نے ملکی اور غیرملکی میڈیا کو ان مقامات کا دورہ کرنے کی دعوت دی ہے تاکہ وہ خود آ کر دیکھ سکیں کہ یہاں کون سی پناہ گاہیں تھیں۔ حقائق سب کے سامنے آ جائیں گے۔”

واضح رہے کہ بھارتی حکومت نے آپریشن ’سندور‘ کے تحت پاکستان میں نو مقامات پر دہشتگردی سے وابستہ انفراسٹرکچر کو نشانہ بنانے کا دعویٰ کیا تھا، تاہم حملوں میں عام شہریوں کی ہلاکتوں اور مساجد کی تباہی کی اطلاعات سامنے آئی ہیں۔

پاکستانی فوج کے ترجمان کے مطابق بھارت نے احمد پور شرقیہ، مریدکے، سیالکوٹ، شکرگڑھ، مظفرآباد اور کوٹلی پر مجموعی طور پر 24 حملے کیے جن میں خواتین اور بچوں سمیت 10 افراد ہلاک ہوئے۔