پاکستان: پاک فضائیہ کا مقامی ’تیمور‘ ویپن سسٹم کا کامیاب تجربہ

اسلام آباد (ڈیلی اردو ) پاکستان فضائیہ نے مقامی طور پر تیار کردہ ’تیمور‘ ویپن سسٹم کا کامیاب فلائٹ ٹیسٹ کیا ہے۔

آئی ایس پی آر کی جانب سے جاری اعلامیے کے مطابق، تیمور ایئر لانچڈ کروز میزائل 600 کلومیٹر تک زمینی اور بحری اہداف کو انتہائی درستگی کے ساتھ نشانہ بنانے کی صلاحیت رکھتا ہے۔

اعلامیے میں کہا گیا ہے کہ کم بلندی پر پرواز کی صلاحیت کی بدولت یہ میزائل دشمن کے ائیر اور میزائل ڈیفنس سسٹمز کو چکمہ دینے میں مؤثر ہے، جبکہ تیمور کروز میزائل جدید نیوی گیشن اور گائیڈنس سسٹمز سے لیس ہے۔

آئی ایس پی آر کے مطابق فلائٹ ٹیسٹ کا مشاہدہ پاک افواج کے سینئر افسران اور سائنسدانوں نے کیا۔ اس موقع پر ائیر چیف مارشل ظہیر احمد بابر سدھو نے سائنسدانوں اور انجینئرز کو کامیاب تجربے پر مبارکباد دی۔

دوسری جانب صدرِ مملکت نے بھی پاکستان فضائیہ کی جانب سے مقامی طور پر تیار کردہ تیمور ویپن سسٹم کے کامیاب تجربے پر خراجِ تحسین پیش کیا ہے۔