پاکستان کی بھارتی چیف آف ڈیفنس اسٹاف کے بیان کی شدید الفاظ میں مذمت

اسلام آباد (ڈیلی اردو) پاکستان نے بھارتی چیف آف ڈیفنس اسٹاف کے بیان کی شدید الفاظ میں مذمت کی ہے۔

ترجمان دفتر خارجہ نے کہا ہے کہ بھارتی چیف آف ڈیفنس اسٹاف کا بیان بھارتی انتہا پسندی کا عکاس ہے۔ جموں کشمیر میں دہشتگردی کا مرتکب بھارت دہشتگردی کے معاملے پر بات نہیں کرسکتا۔

ترجمان دفتر خارجہ کے مطابق جموں کشمیر کو دنیا کی سب سے بڑی جیل میں تبدیل کردیا گیا۔ پانچ اگست سے 80 لاکھ کشمیری محصور ہیں۔ نو لاکھ بھارتی فوجی انسانی حقوق پامال کررہے ہیں۔

ترجمان دفتر خارجہ نے مزید کہا کہ بھارتی بیان ایف اے ٹی ایف کی تکنیکی کارروائی کو سیاسی بنانے کی مذموم کوشش ہے۔ پاکستان نے عالمی برادری کو بھارت کی بدنیت کوششوں سے متعدد بار آگاہ کیا ہے۔ توقع کرتے ہیں کہ ایف اے ٹی ایف ممبران ان بھارتی سازشوں کو مسترد کردیں گے۔