پاکستان کے احتجاج پر امریکہ نے کشمیر کا ’متنازع نقشہ‘ ہٹا دیا

اسلام آباد (ڈیلی اردو) پاکستان کی وزارتِ خارجہ نے دعویٰ کیا ہے کہ امریکہ نے اس کی درخواست پر سوشل میڈیا پلیٹ فارم X سے ایک ایسی پوسٹ ڈیلیٹ کر دی، جس میں پاکستان کے زیرِ انتظام کشمیر کو انڈیا کا حصہ دکھایا گیا تھا۔

ترجمان دفتر خارجہ کے مطابق یہ نقشہ امریکہ کے تجارتی نمائندے Office of the United States Trade Representative (یو ایس ٹی آر) کے اکاؤنٹ سے شیئر کیا گیا تھا۔ اس پوسٹ میں India اور United States کے درمیان تجارتی معاہدے کی تفصیلات بیان کی گئی تھیں اور ساتھ ایک نقشہ بھی جاری کیا گیا تھا، جس میں پورے جموں و کشمیر کو انڈیا کا حصہ دکھایا گیا۔

وزارتِ خارجہ کے ترجمان کے مطابق پاکستان نے اس معاملے پر امریکی حکام سے رابطہ کیا اور مؤقف اختیار کیا کہ یہ نقشہ اقوام متحدہ کی قراردادوں کے منافی ہے۔ ترجمان نے کہا کہ امریکی حکام کو اس پر اپنی غلطی کا احساس ہوا اور نقشے والی پوسٹ کو ہٹا دیا گیا۔

یاد رہے کہ کشمیر کا خطہ طویل عرصے سے پاکستان اور انڈیا کے درمیان تنازع کا مرکز ہے۔ دونوں ممالک اس علاقے پر دعویٰ کرتے ہیں اور اس سلسلے میں جنگیں بھی لڑ چکے ہیں، جبکہ لائن آف کنٹرول پر فائرنگ کے واقعات بھی سامنے آتے رہے ہیں۔

اقوام متحدہ کی سلامتی کونسل نے 21 اپریل 1948 کو ایک قرارداد منظور کی تھی، جس میں مسئلہ کشمیر کے حل کے لیے مرحلہ وار اقدامات تجویز کیے گئے تھے۔ تاہم بعد ازاں اختلافات کے باعث یہ معاملہ حتمی نتیجے تک نہ پہنچ سکا۔

ترجمان دفتر خارجہ کا کہنا تھا کہ اقوام متحدہ کی ویب سائٹ پر جموں و کشمیر کا بین الاقوامی طور پر تسلیم شدہ نقشہ موجود ہے، جس میں اسے متنازع علاقہ قرار دیا گیا ہے اور اس کا حتمی فیصلہ سلامتی کونسل کی قراردادوں کے مطابق ہونا ہے۔

دوسری جانب سوشل میڈیا پر انڈین اور پاکستانی صارفین کی جانب سے مختلف ردِعمل سامنے آیا۔ بعض انڈین صارفین نے مؤقف اختیار کیا کہ کشمیر انڈیا کا حصہ ہے اور پوسٹ میں کچھ غلط نہیں تھا، جبکہ پاکستانی صارفین نے کہا کہ کشمیر اقوام متحدہ کی قراردادوں کے تحت متنازع علاقہ ہے اور نقشے کی تصحیح درست اقدام تھا۔