پاکستانی سیکیورٹی اداروں کا آپریشن، ’را‘ کیلئے جاسوسی میں ملوث 3 افراد گرفتار

اسلام آباد (ڈیلی اردو) پاکستان کی حساس اداروں اور سیکیورٹی فورسز نے کامیاب کارروائی کرتے ہوئے بھارتی سرپرستی میں جاسوسی میں ملوث افراد کو گرفتار کر لیا۔

سیکیورٹی ذرائع کے مطابق سیکیورٹی اداروں نے بھارتی خفیہ ایجنسی ’را‘ کے لیے جاسوسی میں ملوث 3 افراد کو گرفتار کیا ہے، ملزمان کا تعلق نارووال، بہاولپور اور ضلع نیلم آزاد کشمیر سے ہے۔

ذرائع کا کہنا ہے کہ ملزمان نے اعتراف کیا ہے کہ انہیں سوشل میڈیا ایپس پر خواتین رقم کا جھانسہ دے کر حساس معلومات تک رسائی حاصل کرتی تھیں، ملزمان کو رقوم کرپٹو والٹس اور بینک اکاؤنٹس کے ذریعے منتقل کی گئیں۔

سیکیورٹی ذرائع نے بتایا ہے کہ گرفتار ملزمان نے اعتراف کیا ہے کہ وہ ’را‘ سے منسلک خواتین سے مسلسل رابطے میں تھے۔

 ملزمان کے خلاف آفیشل سیکرٹ ایکٹ کے تحت مقدمہ درج کر کے ان کو قانونی کارروائی کے بعد سزائیں سنا دی گئیں۔