پشاور: اسلام قبول نہ کرنے پر ہندو شہری فائرنگ سے ہلاک

پشاور (ڈیلی اردو)صوبہ خیبر پختونخوا کے دارالحکومت پشاور میں ایک ہندو شہری کو مبینہ طور پر زبردستی اسلام قبول کروانے کی کوشش کے بعد فائرنگ کر کے ہلاک کر دیا گیا ہے۔

پولیس کے مطابق یہ واقعہ سنیچر کے روز پوسٹل کالونی میں پیش آیا، جب 56 سالہ ندیم امین اپنے کام سے فارغ ہو کر گھر واپس جا رہے تھے۔ ندیم ایک سرکاری ادارے میں سینیٹری ورکر کے طور پر خدمات انجام دے رہے تھے۔

واقعے کے بعد حملہ آور فرار ہونے میں کامیاب ہو گیا، تاہم پولیس نے 24 گھنٹوں کے اندر اسے چارسدہ سے گرفتار کر لیا۔ بھانہ ماڑی پولیس اسٹیشن کے ایس ایچ او اجمل حیات نے تصدیق کی ہے کہ ملزم مشتاق نے ابتدائی تفتیش میں فائرنگ کر کے ندیم امین کو ہلاک کرنے کا اعتراف کر لیا ہے۔

مقتول کے بھائی ساگر امین کی مدعیت میں درج ایف آئی آر کے مطابق ملزم مشتاق گزشتہ دو سے تین ماہ سے ندیم امین پر اسلام قبول کرنے کے لیے دباؤ ڈال رہا تھا۔ انکار پر اس نے ندیم کو سر میں گولی مار دی، جس کے نتیجے میں وہ زخموں کی تاب نہ لاتے ہوئے ہلاک ہو گئے۔

مقتول کے دوسرے بھائی اویناش نے بتایا کہ ان کے بھائی کے دوستوں نے انہیں آگاہ کیا تھا کہ ایک شخص انہیں اسلام قبول کرنے کے لیے مسلسل تنگ کر رہا ہے، تاہم ندیم نے کبھی گھر میں اس حوالے سے کوئی بات نہیں کی۔

ندیم امین کے پسماندگان میں ان کی بیوی، دو بیٹے اور دو بیٹیاں شامل ہیں۔ پولیس کا کہنا ہے کہ ملزم کے خلاف قانونی کارروائی جاری ہے اور مزید تفتیش کی جا رہی ہے۔