پشاور: ایف سی ہیڈکوارٹر پر خودکش حملے کے نیٹ ورک کی نشاندہی، 150 سے زائد افراد سے تحقیقات

پشاور (نمائندہ ڈیلی اردو) پاکستان کے شورش زدہ صوبے خیبر پختونخوا کے شہر پشاور کے علاقے صدر میں واقع فیڈرل کانسٹیبلری ہیڈکوارٹر پر گزشتہ ماہ ہونے والے خودکش حملے میں ملوث دہشتگرد نیٹ ورک کی نشاندہی کر لی گئی ہے۔ تفتیشی حکام کے مطابق حملے میں شامل خودکش بمباروں کا تعلق ایک کالعدم دہشتگرد تنظیم سے تھا۔

حکام نے بتایا کہ خودکش حملہ آوروں نے واردات سے قبل پشاور میں قیام کیا اور شہر کے مختلف راستوں اور حساس مقامات سے بخوبی واقف ہو گئے تھے۔ تحقیقات میں یہ بھی سامنے آیا کہ خودکش بمباروں کو نہ صرف رہائش فراہم کی گئی بلکہ خودکش جیکٹس کی تیاری اور فراہمی میں بھی سہولت فراہم کی گئی۔

تفتیشی حکام کے مطابق اس کیس میں اب تک 150 سے زائد افراد سے تفتیش کی جا چکی ہے، جبکہ نیٹ ورک سے جڑے مزید افراد کی شناخت کے لیے تحقیقات کا دائرہ وسیع کر دیا گیا ہے۔

واضح رہے کہ گزشتہ ماہ ایف سی ہیڈکوارٹر پشاور پر حملے میں تین اہلکار ہلاک اور پانچ زخمی ہوئے تھے، جبکہ خودکش بمبار سمیت تین حملہ آور بھی ہلاک ہوئے تھے۔ تفتیشی اداروں کا کہنا ہے کہ واقعے میں ملوث عناصر کو قانون کے کٹہرے میں لایا جائے گا۔