پشاور: اے آئی جی اشرف نور اور بیرسٹر ہارون بلور پر حملوں میں ملوث دو دہشت گرد’ مبینہ مقابلے میں ہلاک

پشاور (ڈیلی اردو) کاؤنٹر ٹیررازم ڈیپارٹمنٹ (سی ٹی ڈی) نے پشاور میں تھانہ سربند پر حملے میں ملوث کالعدم تنظیم کے دو دہشت گردوں کو مبینہ مقابلے کے دوران ہلاک کردیا۔

تفصیلات کے مطابق سی ٹی ڈی پشاور ریجن اور پشاور پولیس نے گزشتہ شب ڈی ایس پی سردار حسین اور دو پولیس اہلکاروں کی ہلاکت میں ملوث دہشت گردوں کے سہولت کاروں کی موجودگی کی اطلاع پر پشاور کے نواحی علاقے سربند شنواری میں آپریشن کیا۔

سی ٹی ڈی اور پولیس اہلکاروں کے علاقے میں پہنچتے ہی دہشت گردوں نے فائرنگ شروع کی جس کے بعد دو طرفہ فائرنگ کا سلسلہ شروع ہوا جو کافی دیر جاری ہوا، فائرنگ کے نتیجے میں دو دہشت گرد ہلاک ہوئے جن کی شناخت گل حئی اور حضرت عمر کے ناموں سے ہوئی۔

سی ٹی ڈی حکام کے مطابق ہلاک ہونے والے دہشت گرد گل حئی سہولت کاری، آئی ڈی دھماکے اور بھتہ خوری میں ملوث تھا، دہشت گرد عمر ایڈیشنل انسپکٹر جنرل (آئی جی) پولیس ہیڈکوارٹر اشرف نور، عوامی نیشنل پارٹی کے رہنما بیرسٹر ہارون بلور پر خودکش دھماکے میں مطلوب تھا، ہلاک دہشت گردوں سے اسلحہ بھی برآمد ہوا، دونوں دہشت گردوں کا تعلق کالعدم تنظیم سے تھا۔

سی ٹی ڈی کے مطابق ایک دہشت گرد کا تعلق خیبر کے علاقے باڑہ اور دوسرے کا تعلق مہمند اور حال پشاور کے علاقے یکہ توت سے ہے۔

سی ٹی ڈی ترجمان کے مطابق دہشت گردوں کے قبضے سے بڑی مقدار میں اسلحہ اور گولہ بارود برآمد ہوئے جبکہ آپریشن کے دوران تاریکی کا فائدہ اٹھاتے ہوئے 2 سے 3 دہشت گرد فرار ہو گئے۔

پولیس کی بھاری نفری موقع پر پہنچ کر علاقے میں فرار دہشگردوں کی گرفتاری کے لئے سرچ آپریشن شروع کردیا ہے۔