پشاور خودکش دھماکا: مختلف شہروں میں سیکیورٹی ہائی الرٹ

پشاور (ڈیلی اردو) پشاور پولیس لائنز میں مسجد میں ہونے والے خودکش دھماکے بعد مختف شہروں کی سیکیورٹی ہائی الرٹ کردی گئی ہے۔

تفصیلات کے مطابق پشاور میں نماز ظہر کے دوران ایک خودکش دھماکہ ہوا جس میں اب تک 50 افراد کی ہلاکت کی تصدیق کردی گئی ہے جبکہ 146 افراد شدید زخمی حالت میں موجود ہیں۔ اس خودکش دھماکے کی پیش نظر ملک کے اہم شہروں کی سیکیورٹی کو ہائی الرٹ کردیا گیا ہے۔

آئی جی سندھ کی جانب سے سندھ پولیس کو ہائی الرٹ رہنے کے احکامات جاری کردیئے گئے ہیں جس کے تحت مساجد، امام بارگاہوں سمیت دیگر تمام مذہبی مقامات پر سیکیورٹی اقدامات مذید سخت کیئے جائیں گے۔

اس حوالے سے غلام نبی میمن کا کہنا ہے کہ مساجد، امام بارگاہوں سمیت دیگر تمام مذہبی مقامات پر سیکیورٹی اقدامات مذید سخت کیئے جائیں جبکہ داخلی اور خارجی راستوں پر پولیس پکٹنگ، ناکہ بندی کو غیر معمولی بنایا جائے۔

انہوں نے کہا ہے کہ علاقوں میں نگرانی اور ایڈوانس انٹیلی جینس کلیکشن کی بدولت جرائم کے خلاف کریک ڈاؤن کو کامیاب بنایا جائے اور زونز، ڈسٹرکٹس، پولیس اسٹیشنز کے باہم روابط سمیت قانون نافذ کرنیوالے دیگر اداروں کیساتھ بھی مسلسل روابط رکھے جائیں۔

اس حوالے سے ترجمان اسلام آباد کیپیٹل پولیس نے بتایا ہے کہ آئی جی اسلام آباد ڈاکٹر اکبر ناصر خاں نے اسلام آباد میں سکیورٹی ہائی الرٹ کے احکامات جاری کردئیے ہیں جبکہ تمام داخلی و خارجی راستوں پر چیکنگ بڑھا دی گئی ہے۔