پشاور سے داعش کے 2 خودکش حملہ آوروں سمیت 3 دہشت گرد گرفتار

پشاور (حسام الدین) کاونٹر ٹیررازم ڈیپارٹمنٹ خیبرپختونخوا نے ملک کے دیگر شہروں اور پشاور کے حساس مقامات اور سیاسی شخصیات کو نشانہ بنانے کی منصوبہ بندی کرنے والے کالعدم تنظیم داعش خراسان کے 2 خودکش حملہ آوروں سمیت 3 دہشتگردوں کو گرفتار کر لیا ہے۔

کاونٹرٹیرازم ڈیپارٹمنٹ (سی ٹی ڈی) کے ذرائع کے مطابق چند روز قبل خفیہ اطلاع موصول ہوئی کہ کالعدم تنظیم داعش خراسان پشاور اور مضافاتی علاقوں میں خودکش بمباروں کی تربیت کررہے ہیں جبکہ چند تربیت یافتہ شدت پسندوں کو ملک کے حساس علاقوں اور سیاستدانوں پر خودکش حملہ کرنے کی ذمہ داری سونپی گئی ہے۔

سی ٹی ڈی پشاور نے متنی کے علاقے میرہ میں کالعدم تنظیم داعش کے 2 خودکش حملہ آوروں کو گرفتار کیا جس میں ایک کا تعلق متنی اور دوسرے کا تعلق لنڈی کوتل حال اچینی پشاور سے ہے۔

کالعدم تنظیم داعش خراسان سے تعلق رکھنے والے ایک افغانی شدت پسند کو سی ٹی ڈی پشاور نے اس وقت گرفتار کیا جب داعش خراساں کی جانب سے ایک شکایت کنندہ دھمکی ملی تھی، شدت پسند اپنے ٹارگٹ کی جانب جارہا تھا تو اطلاع ملتے ہی سی ٹی ڈی اہلکاروں نے کاروائی کرکے ننگرھار افغانستان سے تعلق رکھنے والے داعش کے شدت پسند کو گرفتار کیا جس کے قبضے سے ایک عدد دستی بم برآمد ہوا۔

ابتدائی تفتیش کے دوران گرفتار شدت پسند نے بتایا کہ دستی بم ان کی تنظیم کے کمانڈر عبداللہ نے صابر کے ذریعے بھجوایا ہے اور ریگی ماڈل ٹاون میں سکیورٹی کی تنصیبات پر حملہ کرنے کا حکم ملا تھا اس سے قبل پر سکیورٹی فورسز کی تنصیبات پر حملہ کیا گیا تھا اور اس بار یہ منصوبہ بنایا گیا کہ سکیورٹی فورسز پر دستی بم گرایا جائے تاہم ٹارگٹ کو نشانہ بنانے سے قبل سی ٹی ڈی نے انہیں گرفتار کر لیا ہے۔