پشاور میں دہشت گردوں کی فائرنگ سے ایس ایچ او متنی زخمی، ایک حملہ آور گرفتار، دو فرار

پشاور (ڈیلی اردو) صوبہ خیبر پختونخوا کے صوبائی دارالحکومت پشاور میں دہشت گردوں کی فائرنگ سے ڈیوٹی پر مامور ایس ایچ او متنی زخمی ہوگئے۔

پولیس حکام کے مطابق ایس ایچ او تھانہ متنی عمران الدین جمعے کی نماز کے دوران متنی بازار میں اپنے فرائض کی انجام دہی کے لئے دیگر ٹیم کے ہمراہ مامور تھے، کہ موٹر سائیکل پر سوار مسلح دہشت گردوں نے ان پر فائرنگ کردی۔ فائرنگ سے ایس ایچ او عمران الدین زخمی ہوگئے۔

پولیس حکام کا کہنا ہے کہ موقع پر موجود دیگر پولیس اہلکاروں نے ایک حملہ آور کو گرفتار کرلیا، جب کہ اس کے دیگر دو ساتھی فرار ہونے میں کامیاب ہوگئے۔

پولیس کا کہنا ہے کہ ایس ایچ او کو ٹانگ پر گولی لگی ہے اور ان کی حالت خطرے سے باہر ہے، جب کہ حملہ آور کو گرفتار کر کے تھانہ متنی منتقل کردیا گیا ہے، اور اس سے مزید تفتیش جاری ہے۔