پشاور: کالعدم تحریک طالبان کا صوبائی وزیر سے 80 لاکھ روپے بھتے کا مطالبہ

پشاور (ڈیلی اردو) خیبر پختونخوا کے وزیر برائے کھیل عاطف خان کو کالعدم تحریک طالبان پاکستان کی جانب سے 80 لاکھ روپے بھتے کا خط موصول ہوا ہے۔

وزیر برائے کھیل عاطف خان نے تصدیق کرتے ہوئے بتایا کہ مجھے طالبان کی طرف سے بھتے کا خط موصول ہوا ہے جس کو متعلقہ سیکیورٹی اداروں کے ساتھ شئیر کیا ہے، دیکھتے ہیں متعلقہ سیکیورٹی ادارے اس حوالے سے کیا حکمت عملی کرتی ہیں۔

وزیر عاطف خان بھی بھتہ خور سے محفوظ نہیں۔
کلعدم تنظیم نے عاطف خان سے 80 لاکھ روپے کی ڈیمانڈ کر دی۔ @AtifKhanpti pic.twitter.com/ejrV9jDykz

— Mehwish Qamas Khan (@MehwishQamas) October 19, 2022

صوبائی وزیر کا کہنا تھا کہ دیگر رہنماؤں کو خط موصول ہونے سے متعلق میرے علم میں نہیں لیکن میں نے واضح طور پر آگاہ کیا ہے۔

خط میں صوبائی وزیر کو تنبیہ کی گئی ہے کہ ہمارے پاس آپ کے حوالے سے مکمل معلومات اور ریکارڈ موجود ہے، 3 روز کے اندر جواب دیں۔ یہ بھی کہا گیا ہے کہ آپ ٹی ٹی پی مردان کے مطلوبہ افراد کی فہرست میں شامل ہیں۔

دوسری جانب کالعدم تحریک طالبان پاکستان (ٹی ٹی پی) نے خیبرپختونخوا کے وزیر عاطف خان کے نام سوشل میڈیا پر گردش کرنے والے دھمکی آمیز خط کو جعلی قرار دے دیا۔

کالعدم ٹی ٹی پی کی جانب سےجاری بیان میں کہا گیا ہے کہ ان کی تنظیم کی جانب سے عاطف خان کو بھتے کیلئے کوئی خط نہیں بھیجا گیا۔