پشاور کے قریب ایف سی چوکی پر دہشت گردوں کا حملہ، 6 اہلکار ہلاک، 8 اغوا

پشاور (ڈیلی اردو) پاکستان کے شورش زدہ صوبہ خیبر پختونخوا کے صوبائی حکومت پشاور کے قریب حسن خیل کے علاقے میں فیڈرل کانسٹیبلری (ایف سی) کی ایک چوکی پر دہشت گردوں کے حملے میں 6 اہلکار ہلاک جبکہ 4 زخمی ہو گئے ہیں۔

خیبر پختونخوا کے سینیئر پولیس حکام نے حملے میں 6 اہلکاروں کی ہلاکت کی تصدیق کی ہے۔

سکیورٹی ذرائع کے مطابق چوکی میں تعینات اہلکاروں نے حملے پر فوری جوابی کارروائی کی، جس کے دوران 4 دہشت گرد ہلاک ہوئے، تاہم فرار ہونے والے حملہ آور مبینہ طور پر لاشیں اپنے ساتھ لے گئے۔

ذرائع کا کہنا ہے کہ حملہ آور فیڈرل کانسٹیبلری کے 8 اہلکاروں کو بھی اپنے ساتھ لے گئے ہیں، جبکہ علاقے میں سرچ اور کلیئرنس آپریشن جاری ہے۔

حملے کی ذمہ داری کالعدم تحریک طالبان پاکستان (ٹی ٹی پی) نے سوشل میڈیا پر جاری ایک بیان میں قبول کی ہے۔

یہ واقعہ پشاور کے قریب حسن خیل کے علاقے میں رات ایک سے دو بجے کے درمیان پیش آیا۔ حسن خیل نیم قبائلی علاقے درہ آدم خیل کے قریب واقع ہے اور ماضی میں بھی دہشت گردوں کی سرگرمیوں کا مرکز رہا ہے۔

وفاقی وزیر داخلہ محسن نقوی اور وزیر مملکت طلال چوہدری نے پشاور میں حملے میں ہلاک ہونے والے اہلکاروں کی نماز جنازہ میں شرکت کی۔

یاد رہے کہ اکتوبر 2025 میں حسن خیل پولیس اسٹیشن پر حملے کے دوران فائرنگ کے تبادلے میں 2 دہشت گرد ہلاک ہوئے تھے، جبکہ مئی 2024 میں علاقے میں ایک انٹیلیجنس بیسڈ آپریشن کے دوران 5 دہشت گرد ہلاک ہوئے تھے۔ اپریل 2026 میں بھی حسن خیل کے نواحی علاقوں میں دہشت گردوں کے ٹھکانوں کے خلاف کارروائیاں کی گئی تھیں۔