پنجاب: اٹک میں سی ٹی ڈی کا آپریشن، 5 دہشت گرد ہلاک، خودکش جیکٹ برآمد

لاہور (نمائندہ ڈیلی اردو) پاکستان کے صوبہ پنجاب کے ضلع اٹک کی تحصیل جنڈ کے گاؤں منکور میں کاؤنٹر ٹیررازم ڈیپارٹمنٹ (سی ٹی ڈی) نے خفیہ اطلاع پر دہشت گردوں کے خلاف انٹیلی جنس بیسڈ آپریشن کیا، جس کے دوران فائرنگ کے تبادلے میں 5 دہشت گرد ہلاک ہو گئے۔

سی ٹی ڈی ذرائع کے مطابق آپریشن دہشت گردوں کی موجودگی کی اطلاع ملنے پر کیا گیا۔ کارروائی کے دوران دہشت گردوں نے قانون نافذ کرنے والے اہلکاروں پر فائرنگ کی، جس کے بعد دونوں جانب سے شدید فائرنگ کا تبادلہ ہوا۔

فائرنگ کے تبادلے میں 5 دہشت گرد مارے گئے جبکہ سی ٹی ڈی اہلکار محفوظ رہے۔ ہلاک دہشت گردوں کے قبضے سے ایک خودکش جیکٹ، دو دستی بم، تین سب مشین گنز (ایس ایم جی)، بڑی مقدار میں گولیاں اور بارودی مواد برآمد کیا گیا ہے۔

سی ٹی ڈی حکام کا کہنا ہے کہ ہلاک ہونے والے دہشت گرد حساس تنصیبات اور عوامی مقامات کو نشانہ بنانے کی منصوبہ بندی کر رہے تھے۔ برآمد ہونے والے اسلحہ اور دھماکا خیز مواد کو تحویل میں لے کر مزید تحقیقات شروع کر دی گئی ہیں۔

حکام کے مطابق علاقے میں کلیئرنس آپریشن مکمل کر لیا گیا ہے جبکہ دہشت گردوں کی شناخت اور ان کے نیٹ ورک کے حوالے سے تحقیقات جاری ہیں۔

سی ٹی ڈی کا کہنا ہے کہ پنجاب میں دہشت گردی کے خطرات کے پیش نظر انٹیلی جنس بیسڈ آپریشنز کا سلسلہ جاری رکھا جائے گا تاکہ امن و امان کی صورتحال کو برقرار رکھا جا سکے۔