پنجاب بھر میں سی ٹی ڈی کے آپریشنز، 13 دہشت گرد گرفتار

لاہور (نمائندہ ڈیلی اردو) پاکستان کے صوبہ پنجاب کے مختلف شہروں میں کاؤنٹر ٹیررازم ڈیپارٹمنٹ (سی ٹی ڈی) نے بڑے پیمانے پر کارروائیاں کرتے ہوئے 13 دہشت گردوں کو گرفتار کر لیا۔

ترجمان سی ٹی ڈی کے مطابق صوبے بھر میں 58 انٹیلی جنس بیسڈ آپریشنز کیے گئے، جن کے دوران دہشت گردی کا ایک بڑا نیٹ ورک بے نقاب کیا گیا۔

یہ کارروائیاں لاہور، ساہیوال، ملتان، جہلم، منڈی بہاؤالدین، جھنگ، چنیوٹ اور میانوالی میں کی گئیں۔

حکام کے مطابق لاہور سے کالعدم تحریک طالبان پاکستان کے ایک انتہائی خطرناک دہشت گرد مختار کو گرفتار کیا گیا۔

گرفتار دہشت گردوں کے قبضے سے بھاری مقدار میں دھماکا خیز مواد، 4 آئی ای ڈیز، 8 ڈیٹونیٹرز، حفاظتی فیوز وائر، ممنوعہ لٹریچر اور اسٹیکرز برآمد کیے گئے ہیں۔

ترجمان سی ٹی ڈی کا کہنا ہے کہ گرفتار دہشت گرد قانون نافذ کرنے والے اداروں کے دفاتر کو نشانہ بنانے کی منصوبہ بندی کر رہے تھے۔

گرفتار دہشت گردوں کی شناخت مختار احمد، یونس، فیروز خان، ولی، اویس، فرمان، مومن، عدنان، راجہ فیصل، رضا خان، غلام شبیر، راؤ ساجد اور مختار شاہ کے ناموں سے ہوئی ہے۔

سی ٹی ڈی کے مطابق رواں ہفتے پنجاب بھر میں 1487 کومبنگ آپریشنز بھی کیے گئے، جن کے دوران 53 ہزار 335 افراد سے پوچھ گچھ کی گئی جبکہ 168 مشتبہ افراد کو حراست میں لیا گیا۔

حکام کا کہنا ہے کہ دہشت گردی کے خاتمے اور امن و امان کی بحالی کے لیے صوبہ بھر میں کارروائیاں مزید تیز کی جا رہی ہیں۔