پنجاب: مظفر گڑھ میں نامعلوم موٹر سائیکل سواروں کی فائرنگ سے صحافی ہلاک

مظفر گڑھ (نمائندہ ڈیلی اردو) صوبہ پنجاب کے ضلع مظفر گڑھ میں نامعلوم افراد نے فائرنگ کر کے مقامی اخبار سے وابستہ صحافی اشفاق احمد سیال کو ہلاک کر دیا۔

پنجاب پولیس کے مطابق نامعلوم موٹر سائیکل سواروں نے صحافی اشفاق احمد سیال کو تھرمل بائی پاس پر ٹارگٹ کلنگ کا نشانہ بنایا اور حملہ آور فرار ہوگئے ۔

پولیس کے مطابق صحافی اشفاق احمد سیال کو زخمی حالت میں ڈی ایچ کیو ہسپتال منتقل کیا گیا لیکن وہ جانبر نہ ہوسکے۔

حکام کے مطابق مقتول صحافی کی لاش کو پوسٹ مارٹم کے لیے ہسپتال منتقل کردیا گیا۔

اشفاق احمد سیال گزشتہ چند برسوں سے روزنامہ ’ؐخبریں‘ ملتان میں بطور رپورٹر خدمات سرانجام دے رہے تھے۔

پولیس حکام کا کہنا تھا کہ صحافی کے قتل کے معاملے کی مزید تحقیقات شروع کردی گئی ہیں اور واردات میں ملوث ملزمان کی تلاش جاری ہے۔

آل پاکستان جرنلسٹس کونسل (رجسٹرڈ) پاکستان کے بانی و چیئرمین شبیر حسین طوری نے پنجاب حکومت سے مطالبہ کیا ہے کہ صحافی پر ہونے والے حملے میں ملوث ملزمان کو انصاف کے کٹہرے میں لایا جائے۔