پنجاب: میانوالی ڈرون حملے میں ٹی ٹی پی کے تین شدت پسند ہلاک

واشنگٹن (ش ح ط) پاکستان کے صوبے پنجاب کے ضلع میانوالی کے علاقے مکڑوال میں ایک ڈرون حملے کے نتیجے میں تحریک طالبان پاکستان (ٹی ٹی پی) سے وابستہ تین شدت پسند ہلاک ہو گئے ہیں۔

ڈیلی اردو کو پاکستانی حکام نے بتایا کہ مکڑوال کے پہاڑی علاقے میں دہشتگردوں کو ایک ڈرون کے ذریعے نشانہ بنایا گیا، جس کے نتیجے میں کئی شدت پسند مارے گئے۔
ذرائع کے مطابق ڈرون حملہ مقامی سکیورٹی فورسز کی نگرانی اور انٹیلی جنس معلومات کی بنیاد پر کیا گیا، تاہم مزید تفصیلات کا انتظار ہے۔

دوسری جانب کالعدم تنظیم ٹی ٹی پی نے اپنے ایک بیان میں تصدیق کی ہے کہ مکڑوال میں ڈرون حملے میں ان کے تین ارکان ہلاک ہوئے ہیں۔ ٹی ٹی پی کے ترجمان نے اس حملے کو “امریکی ڈرون حملہ” قرار دیا ہے، تاہم اس دعوے کی نہ تو حکومتی سطح پر تصدیق ہوئی ہے اور نہ ہی آزاد ذرائع سے اس کی توثیق ہو سکی ہے۔

یاد رہے کہ اس سے قبل 21 اپریل کو بھی میانوالی کے علاقے مکڑوال میں سی ٹی ڈی اور پنجاب پولیس نے ایک مشترکہ کارروائی کے دوران ٹی ٹی پی کے 10 سے زائد دہشتگردوں کو ہلاک اور کئی کو زخمی کیا تھا۔

حکام کا کہنا ہے کہ مکڑوال اور اطراف میں دہشتگردوں کے خلاف نگرانی اور کارروائیاں جاری رہیں گی تاکہ علاقے میں امن و امان کو یقینی بنایا جا سکے۔