پی آئی سی حملہ کیس: لاہور پولیس کے 2 اعلیٰ افسران قصور وار قرار

لاہور (ڈیلی اردو) سانحہ پنجاب انسٹی ٹیوٹ آف کارڈیالوجی (پی آئی سی) میں 2 پولیس اعلیٰ افسران کو قصور وار قرار دے دیا گیا۔ رپورٹ میں کہا گیا ہے کہ ایس ایس پی آپریشنز محمد نوید اور ایس پی سول لائنز دوست محمد کھوسہ کی غفلت اور نااہلی کے باعث سانحہ پی آئی سی رونما ہوا۔

وزیراعلی پنجاب عثمان بزدار کے احکامات پر سانحہ پی آئی سی کی تحقیقات کے لیے تشکیل دی گئی۔

کمیٹی نے رپورٹ گذشتہ روز پیش کر دی ہے جس کے مطابق ایس پی سول لائنز دوست محمد کھوسہ وکلا ریلی کے دوران موقع پر ہی نہ پہنچے جبکہ ایس ایس پی آپریشنز محمد نوید موقع پر پہنچ کر بھی کوئی فیصلہ نہ لے سکے۔

رپورٹ میں مزید کہا گیا کہ ہسپتال کے قریب تعینات پولیس فورس کو مناسب طریقے سے گائیڈ نہیں کیا گیا۔ ہنگامہ آرائی کے وقت بروقت فیصلے کرنے کی ضرورت تھی جو نہیں کیے گئے۔ فیصلے کرنے میں ہچکچاہٹ کی وجہ سے صورتحال میں خرابی پیدا ہوئی۔

رپورٹ کے نتائج کی روشنی میں آئندہ صوبائی کابینہ کے اجلاس میں دونوں افسران کے خلاف کارروائی کا فیصلہ کیا جائے گا۔