پیپلزپارٹی کے تمام سینیٹرز نے استعفے بلاول بھٹو کو پیش کردیئے

اسلام آباد (نیوز ڈیسک) سینیٹ میں چیئرمین سینیٹ صادق سنجرانی کے خلاف عدم اعتماد تحریک ناکام ہونے کے بعد پاکستان پیپلزپارٹی کے تمام سینیٹرز نے پارٹی قیادت کو اپنے استعفے پیش کردیے۔اس ضمن میں بتایا گیا کہ سینیٹ میں پیپلزپارٹی کے تمام 21سینیٹرز نے اپنے استعفے پارٹی کے چیئرمین بلاول بھٹو کو پیش کیے۔

پاکستان پیپلزپارٹی کے تمام سینیٹرز نے اخلاقی طور پر اپنے استعفے مجھے جمع کرادئیے ہیں، چیئرمین بلاول بھٹو زرداری pic.twitter.com/vcZu2uqpsp

— PPP (@MediaCellPPP) August 1, 2019

استعفے جمع کرانے والوں میں ڈپٹی چیئرمین سمیت شیری رحمن، رضا ربانی، کرشنا کماری بھی شامل ہیں۔سینیٹرز کی جانب سے پیش کردہ استعفے کے حوالے سے بلاول بھٹو نے بھی تصدیق کی۔

بعدازاں بلاول بھٹو نے صحافیوں سے بات چیت کرتے ہوئے کہا کہ پیپلزپارٹی کے تمام سینیٹرز نے استعفے اخلاقی طور پر دیے۔واضح رہے کہ استعفے منظور کرنے سے متعلق بلاول بھٹو نے کچھ نہیں کہا۔

علاوہ ازیں بلاول بھٹو نے الزام لگایا کہ خفیہ رائے شماری کا فائدہ اٹھا کر ووٹ تبدیل کروائے گئے اس لیے پارٹی ضرور معاملے کی چھان بین کرے گی۔ان کا کہنا تھا کہ سوشل میڈیا پر وائرل ہونے والی پریزائیڈنگ افسر کی ویڈیو میں خود انہوں نے اقرار کیا کہ 54ووٹ تحریک عدم اعتماد کی حمایت میں تھے۔

پیپلزپارٹی کے چیئرمین نے کہا کہ عام انتخابات کی طرح اس مرتبہ بھی ووٹ مسترد کرکے اپوزیشن کوہرایا گیا۔بلاول بھٹو نے کہا کہ یہ عمل وفاق، سینیٹ اور جمہوریت کے لیے خطرناک ہے لیکن میں مایوس بالکل نہیں ہوں، جمہوریت کے لیے جدو جہد کرتا رہوں گا۔