چین طالبان کے ساتھ دوستانہ تعلقات کیلئے تیار ہے، ترجمان وزارت خارجہ

بیجنگ (ڈیلی اردو) چین نے افغان طالبان کیساتھ دوستانہ تعلقات قائم کرنے کاعندیہ دے دیا اور کہا کہ چین افغان عوام کے حق کا احترام کرتا ہے کہ وہ اپنی قسمت کا آزادانہ طور پر تعین کریں۔

فرانسیسی خبر ایجنسی اے ایف پی کے مطابق چینی وزارت خارجہ کی ترجمان ہُوا چونینگ نے کہا ہے کہ چین طالبان کے ساتھ دوستانہ تعلقات کے لیے تیار ہیں، چین افغان عوام کے حقوق کا احترام کرتا ہے، افغان عوام کو حق ہے کہ وہ اپنی منزل کا خود تعین کریں۔

VIDEO: ???????????????? China is ready to deepen "friendly and cooperative" relations with #Afghanistan, a government spokeswoman says, after the Taliban seized control of the country pic.twitter.com/PmaDcyTL7Z

— AFP News Agency (@AFP) August 16, 2021

ادھر طالبان نے ملک کا کنٹرول سنبھال لیا۔ دوحہ میں طالبان کے سیاسی دفتر کے سربراہ ملا عبد الغنی برادر نے کابل کی فتح پر مبارکباد کا پیغام جاری کرتے ہوئے کہا کہ طالبان کی اصل آزمائش اب شروع ہوئی ہے، عوام کی خدمت کر کے دنیا کے لیے مثال قائم کرنا چاہتے ہیں۔

طالبان ترجمان محمد نعیم نے کہا کہ افغانستان میں جنگ کا اختتام ہوگیا، طالبان کو 20 سال کی جدوجہد اور قربانیوں کا پھل مل گیا، افغانستان میں نئے نظام حکومت کی شکل جلد واضح ہو جائیگی۔ افغانستان کی سر زمین کسی کے خلاف استعمال کرنے کی اجازت نہیں دی جائیگی۔ امید ہے غیرملکی قوتیں افغانستان میں اپنے ناکام تجربے نہیں دہرائیں گی۔

طالبان کمانڈر عبدالقیوم ذاکر نے عرب ٹی وی سے بات کرتے ہوئے کہا کہ کسی خونریزی کے بغیر کابل فتح کرنے پر خوش ہیں، عارضی نظم و نسق کیلئے رابطہ کونسل بن گئی۔ عبداللہ عبداللہ، حامد کرزئی اور گلبدین حکمت یار شامل ہیں۔ ملک میں عبوری حکومت بنانے کی تیاریاں جاری ہیں۔