چین، برطانیہ، جرمنی سمیت مختلف ممالک کے دفاعی اتاشیوں کا کنٹرول لائن کا دورہ

اسلام آباد (ڈیلی اردو) پاکستان میں موجود چین، برطانیہ، فرانس، روس جرمنی سمیت مختلف ممالک کے دفاعی اتاشیوں نے کنٹرول لائن کا دورہ کیا ہے۔

تفصیلات کے مطابق چین، برطانیہ، فرانس، روس جرمنی سمیت مختلف ممالک کے دفاعی اتاشیوں نے کنٹرول لائن کا دورہ کیا اور بھارت کی جانب سے کلسڑ بموں سے ہونے والی جانی اور مالی نقصانات کا جائزہ لیا۔

بھارتی فوج کی جانب سے لائن آف کنڑول پر پوری لوئر نیلم ویلی کو نشانہ بنایا جس سے درجنوں افراد زخمی ہوئے ہیں۔

وادی لیپا ویلی، ددیال، نوسیری، اٹھمقام، شاہ کوٹ میں سینکڑوں کلسٹر بم بکھرے پڑے ہیں، بھارتی شیلنگ سے اٹھمقام ڈسٹرکٹ ہیڈ کوارٹرز ہسپتال بھی تباہ ہوگیا ہے، کلسٹر بموں سے انسانی جانوں اور مویشیوں کو خطرہ ہے۔

واضح رہے کہ بھارت اپنی طرف اقوام متحدہ کے فوجی مبصرین کو لائن اف کنٹرول پر نہیں جانے دیتا، 2015ء سے بھارت کی جانب سے جنگ بندی معاہدے کی متعدد مرتبہ خلاف ورزیاں  کی گئیں جس سے 76 افراد شہید اور 348 زخمی ہوئے۔