ڈی آئی خان : دہشتگردوں کی سہولت کاری کیس میں گرفتار ملزمان ضمانت پر رہا

ڈیرہ اسماعیل خان (ڈیلی اردو) خیبرپختونخواہ کے جنوبی ضلع ڈیرہ اسماعیل خان میں انسدادِ دہشتگردی سے متعلق مقدمے میں گرفتار ملزمان کو عدالت نے ضمانت پر رہا کرنے کا حکم دے دیا۔ تفصیلات کے مطابق سیشن جج ڈیرہ اسماعیل خان نے مقدمہ نمبر 119/2025 میں گرفتار ملزمان کی دو، دو لاکھ روپے کے مچلکوں پر ضمانت منظور کرتے ہوئے رہائی کے احکامات جاری کیے۔

یہ مقدمہ سی ٹی ڈی تھانہ ڈیرہ اسماعیل خان میں سب انسپکٹر ظفر علی شاہ کی مدعیت میں امداد اللہ ولد شیخ یسین بھٹی کے خلاف درج کیا گیا تھا۔ مقدمہ میں دفعہ 120-B، 21(2)، 21(3)، 11-F2 اور 7 اے ٹی اے شامل کی گئی تھیں۔ ایف آئی آر کے مطابق امداد اللہ کے قبضے سے چار عدد پاکٹ فون، واکی ٹاکی اور موبائل فون برآمد کیے گئے تھے، اور ملزم نے دورانِ تفتیش بیان دیا تھا کہ وہ کمانڈر ریاض عرف ملنگ کا تربیت یافتہ کارندہ ہے، جس کے حکم پر یہ سامان شارجہ مارکیٹ کارخانو سے خریدا گیا تاکہ دہشتگرد گروہ پولیس اور سیکیورٹی فورسز کے خلاف کارروائیوں کے دوران رابطے میں رہ سکیں۔

مزید برآں، تفتیش کے دوران ارشد ولد عارف خان قوم جاجی سکنہ باڑہ اور محمد حذیفہ ولد نصیر محمد سکنہ نیو حیدرآباد کو بھی دہشتگردوں کی سہولت کاری کے الزام میں گرفتار کیا گیا تھا۔ ان ملزمان کی جانب سے سردار سیف الرحمن خان ایڈوکیٹ ہائیکورٹ عدالت میں پیش ہوئے، جنہوں نے ضمانت کی درخواست دائر کی۔

دونوں فریقین کے دلائل سننے کے بعد، عدالت نے ملزمان کو دو لاکھ روپے کے دو عدد ضمانتی مچلکوں کے عوض رہا کرنے کا فیصلہ سنایا۔ استغاثہ کی جانب سے مقدمے کی پیروی ڈی پی پی نے کی۔