ڈیرہ اسماعیل خان آپریشن: پاکستانی طالبان کا نام نہاد ویلفیئر سربراہ دلاور اور کمانڈر خیام ہلاک

واشنگٹن (ش ح ط) پاکستان کے شورش زدہ صوبے خیبر پختونخوا کے ضلع ڈیرہ اسماعیل خان کی تحصیل کلاچی کے نواحی گاؤں گرہ جہان خانی میں سکیورٹی فورسز کے انٹیلی جنس بنیاد آپریشن کے دوران فائرنگ کے تبادلے میں کالعدم تحریک طالبان پاکستان (ٹی ٹی پی) کے دو اہم کمانڈر ہلاک ہو گئے۔

پولیس کے مطابق سرچ آپریشن کے دوران دہشت گردوں نے سکیورٹی فورسز پر فائرنگ کی، جس کے بعد دونوں جانب شدید فائرنگ کا تبادلہ ہوا۔ اس دوران ایک دھماکے کی آواز بھی سنی گئی۔ کارروائی کے نتیجے میں دو ہائی ویلیو ٹارگٹ دہشت گرد موقع پر ہی ہلاک ہو گئے۔

ہلاک دہشت گردوں کی شناخت خیام اور دلاور کے نام سے ہوئی، جبکہ دونوں کا تعلق تحصیل کلاچی سے بتایا جا رہا ہے۔

حکام کے مطابق دلاور ایک ہائی ویلیو ٹارگٹ تھا، جو علاقے میں کالعدم تحریک طالبان کے نام نہاد ’’ویلفیئر ڈیپارٹمنٹ‘‘ کا سربراہ اور سکیورٹی فورسز کے خلاف متعدد حملوں میں ملوث رہا۔

کارروائی کے دوران خیام بھی ہلاک ہوا۔ سرکاری ذرائع کے مطابق دلاور متعدد پولیس اہلکاروں کی ہلاکت اور سکیورٹی فورسز پر کیے گئے کئی آئی ای ڈی حملوں کا ذمہ دار تھا۔

ذرائع کے مطابق واقعے کے بعد سکیورٹی فورسز نے علاقے کو گھیرے میں لے کر کلیئرنس آپریشن شروع کر دیا ہے۔

مزید تفصیلات کا انتظار ہے۔