ڈیرہ اسماعیل خان : قرآن کی بے حرمتی پر مجرم کو عمر قید کی سزا

ڈیرہ اسماعیل خان (نمائندہ ڈیلی اردو) ضلع ڈیرہ اسماعیل خان کے ایڈیشنل سیشن جج ڈیرہ محمد ایاز خان نے تھانہ ٹائون کی حدود لچھرا میں مشہور زمانہ قرآن پاک کی بے حرمتی کیس کا تفصیلی فیصلہ جاری کرتے ہوئے مجرم کو عمر قید کی سزا سنادی.

پولیس کے مطابق تھانہ ٹائون کی حدود علاقہ لچھرا میں بدبخت مجرم غلام ہاشم پر الزام تھا کہ اس نے گزشتہ سال 31 جولائی کو اپنے گھر کے اندر قرآن پاک کی بے حرمتی کی ،مجرم کے بیٹے کی جانب سے تھانہ ٹائون میں مورخہ 2 اگست 2023 کو جرم زیر دفعہ 295 بی کے تحت مقدمہ درج کیاگیا ۔

پولیس نے مجرم کو گرفتار کرکے چالان عدالت میں پیش کیا ،عدالت نے مجرم پر فرد جرم عائد کی لیکن اس نے صحت جرم سے انکار کیا ۔

استغاثہ کی جانب عدالت میں پانچ گواہان اور شہادتیں پیش کی گئیں ، دونوں جانب کے وکلاء کے دلائل اور بحث سننے کے بعد عدالت نے پندرہ صفحات پر مشتمل تفصیلی فیصلہ جاری کرتے ہوئے جرم ثابت ہونے پر مجرم کو عمر قید (پچیس سال ) کی سزا کے احکامات جاری کردیئے ہیں .