ڈیرہ اسماعیل خان میں دہشت گردوں کے حملے میں 2 فوجی ہلاک، 3 زخمی

ڈی آئی خان (نمائندہ ڈیلی اردو) صوبہ خیبر پختونخوا کے ضلع ڈیرہ اسماعیل خان کی تحصیل کلاچی میں دہشت گردوں کی سیکیورٹی فورسز اور ایلیٹ فورس پر فائرنگ سے 2 اہلکار شہید جبکہ 3 اہلکار زخمی ہو گئے۔

ڈیلی اردو کے مطابق ڈیرہ اسماعیل خان کے تھانہ کلاچی کی حدود مڈی میں سیکیورٹی فورسز اور ایلیٹ فورس دہشت گردوں کی موجودگی کی اطلاع پر آپریشن کر رہی تھی کہ دہشت گردوں نے سیکیورٹی فورسز پر فائرنگ کر دی۔ فائرنگ سے سیکیورٹی فورسز کے دو اہلکار ہلاک جبکہ 3 اہلکار زخمی ہو گئے۔

واقعے کی اطلاع ملتے ہی پولیس کی بھاری نفری جائے وقوعہ پر پہنچ گئی۔ لاشوں اور زخمیوں کو سی ایم ایچ ڈیرہ اسماعیل خان منتقل کر دیا۔

سرکاری ذرائع کے مطابق ہلاک ہونے والوں میں حوالدار محمد شوکت، سپاہی محمد عمران شامل ہیں جبکہ زخمیوں میں سپاہی امجد، سپاہی اجمل، سپاہی جہانزیب شامل ہیں۔ واقعے کے بعد دہشت گرد فرار ہونے میں کامیاب ہو گئے۔
پولیس اور سیکیورٹی فورسز نے علاقہ کو گھیرے میں لے کر سرچ آپریشن شروع کر دیا۔

کلاچی میں دہشت گردوں کے اس حملے سے متعلق پاکستان فوج کے شعبہ تعلقاتِ عامہ کی جانب سے ابھی تک کوئی باضابطہ بیان جاری نہیں کیا گیا ہے۔