ڈیرہ اسماعیل خان میں فوجی قافلے پر دھماکا، 3 اہلکار ہلاک، میجر سمیت 2 زخمی

واشنگٹن (ش ح ط) پاکستان کے شورش زدہ صوبے خیبر پختونخوا کے جنوبی شہر ڈیرہ اسماعیل خان میں ہونے والے بم دھماکے کے نتیجے میں سیکورٹی فورسز کے تین اہلکار ہلاک اور دو زخمی ہو گئے ہیں۔

سرکاری ذرائع کے مطابق دھماکہ تحصیل کلاچی میں اس وقت ہوا جب سیکورٹی فورسز کا قافلہ ڈیرہ اسماعیل خان سے کلاچی کی جانب جا رہا تھا۔ سڑک کنارے نصب دھماکہ خیز مواد کو فورسز کی گاڑی کے قریب ریموٹ کنٹرول کے ذریعے نشانہ بنایا گیا۔

عینی شاہدین کا کہنا ہے کہ دھماکے میں گاڑی تباہ ہوگئی۔

عینی شاہدین اور ریسکیو 1122 حکام نے بتایا کہ دھماکے کے فوراً بعد سیکیورٹی اہلکاروں پر فائرنگ بھی کی گئی، جس سے علاقے میں خوف و ہراس پھیل گیا۔

ریسکیو 1122 کے مطابق دھماکے میں تین اہلکار موقع پر ہی ہلاک ہوئے، جبکہ زخمیوں میں سے بیشتر کی حالت تشویش ناک ہے۔

ہلاک ہونے والوں کی شناخت حوالدار صدام، سپاہی عرفان اور سپاہی عابد کے ناموں سے ہوئی ہے، جبکہ زخمیوں میں میجر حیدر اور سپاہی مبشر شامل ہیں۔

ابتدائی اطلاعات کے مطابق دھماکہ دیسی ساختہ ریموٹ کنٹرول بم سے کیا گیا، تاہم ضلعی پولیس افسر سمیت کسی بھی اعلیٰ عہدیدار نے دھماکے کی نوعیت سے متعلق کوئی باضابطہ بیان جاری نہیں کیا۔

دھماکے کے بعد سیکورٹی فورسز اور پولیس نے علاقے کو گھیرے میں لے کر سرچ آپریشن شروع کر دیا ہے، جبکہ ملزمان کی تلاش جاری ہے۔