ڈیرہ اسماعیل خان: کلاچی میں دہشت گردوں کا حملہ، امن کمیٹی کے 4 ارکان ہلاک، ایک اغوا

ڈی آئی خان (نمائندہ ڈیلی اردو) پاکستان کے شورش زدہ صوبہ خیبر پختونخوا کے ضلع ڈیرہ اسماعیل خان کی تحصیل کلاچی کے نواحی علاقے کوٹ اٹل شریف میں دہشت گردوں کے حملے میں امن کمیٹی کے 4 ارکان ہلاک جبکہ ایک رکن کو اغوا کر لیا گیا۔

پولیس کے مطابق مسلح دہشت گردوں نے گھات لگا کر امن کمیٹی کے ارکان کو نشانہ بنایا اور اندھا دھند فائرنگ کی۔ واردات کے بعد حملہ آور ان کا اسلحہ بھی ساتھ لے گئے۔

حکام کے مطابق حملے میں شاہ زیب، دانش، سولی سمیت ایک نامعلوم شخص ہلاک ہوئے، جبکہ ایک رکن کو اغوا کر لیا گیا۔

واقعے کے بعد علاقے میں خوف و ہراس پھیل گیا جبکہ پولیس اور سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔

پولیس کا کہنا ہے کہ واقعے کی تحقیقات جاری ہیں اور مغوی کی بازیابی اور ملزمان کی گرفتاری کے لیے کارروائیاں تیز کر دی گئی ہیں۔

واضح رہے کہ ڈیرہ اسماعیل خان کے علاقے کلاچی میں کالعدم تحریک طالبان پاکستان کا گنڈا پور گروپ متحرک ہے۔