ڈیرہ غازی خان: سرحدی چوکی لکھانی پر حملہ، 3 دہشت گرد ہلاک، متعدد زخمی

ڈیرہ غازی خان (نمائندہ ڈیلی اردو) پنجاب پولیس نے سرحدی چوکی لکھانی پر دہشت گردوں کے ایک اور حملے کو ناکام بناتے ہوئے 3 دہشت گردوں کو ہلاک اور متعدد کو زخمی کر دیا۔

ترجمان پنجاب پولیس کے مطابق خیبرپختونخوا کی سرحد پر واقع اس چوکی پر 20 سے 25 دہشت گردوں نے مارٹر گولے، راکٹ لانچرز، اسنائپر رائفلز اور دیگر بھاری ہتھیاروں سے حملہ کیا۔ تاہم پولیس، ایلیٹ فورس اور اسپیشل آپریشن یونٹ (ایس او یو) کی جوابی کارروائی کے باعث دہشت گرد پسپا ہونے پر مجبور ہوگئے۔

پولیس کے مطابق پہلے مرحلے میں ایک دہشت گرد ہلاک ہوا جبکہ دیگر متعدد زخمی ہوئے۔ بعد ازاں علاقے میں کیے گئے سرچ آپریشن کے دوران مزید 2 دہشت گردوں کو ہلاک کر دیا گیا۔

آپریشن کے دوران دہشت گرد فرار ہوتے ہوئے اپنے جوتے اور دیگر سامان چھوڑ گئے۔ پولیس کے مطابق حملے میں تمام جوان محفوظ رہے۔

آئی جی پنجاب ڈاکٹر عثمان انور نے پولیس فورس کو کامیاب کارروائی پر شاباش دیتے ہوئے ہدایت دی کہ دہشت گردوں کے خلاف کارروائیاں جاری رکھی جائیں۔

واضح رہے کہ دہشت گردوں نے گزشتہ چند ہفتوں کے دوران کئی مرتبہ چوکی لکھانی پر حملے کی کوشش کی، تاہم ہر بار سیکیورٹی فورسز نے ان حملوں کو ناکام بنا دیا۔