ڈیرہ غازی خان: عسکریت پسندوں نے گرلز پرائمری اسکول کو بارودی مواد سے اڑا دیا

واشنگٹن (ش ح ط) پاکستان کے صوبہ پنجاب کے ضلع ڈیرہ غازی خان میں گزشتہ رات عسکریت پسندوں نے گورنمنٹ گرلز پرائمری اسکول جوتر مرکز پر حملہ کر کے اسکول کی عمارت کو بارودی مواد سے اڑا دیا۔

یہ افسوسناک واقعہ 8 جنوری کو تحصیل تونسہ کے علاقے یونین کونسل مٹھوان، کوہِ سلیمان میں پیش آیا، جہاں عسکریت پسندوں نے گرلز اسکول کو نشانہ بنایا۔ حملے کے نتیجے میں اسکول کے کمروں اور دیواروں کو شدید نقصان پہنچا اور عمارت مکمل طور پر زمین بوس ہو گئی۔

دھماکے کے وقت اسکول خالی ہونے کے باعث کسی جانی نقصان کی اطلاع نہیں ملی۔ پولیس کے مطابق واقعے کی تحقیقات شروع کر دی گئی ہیں جبکہ ملزمان کی تلاش کے لیے علاقے میں سرچ آپریشن بھی کیا جا رہا ہے۔

ڈیلی اردو کے مطابق خیبر پختونخوا سے متصل تونسہ کے سرحدی علاقوں میں کالعدم تحریک طالبان پاکستان (ٹی ٹی پی) کے عسکریت پسند اکثر کارروائیاں کرتے رہے ہیں۔ گزشتہ سال ان علاقوں میں متعدد پولیس چیک پوسٹوں کو نشانہ بنایا گیا۔

پولیس اور کاؤنٹر ٹیررازم ڈیپارٹمنٹ (سی ٹی ڈی) کی کارروائیوں کے دوران کئی شدت پسند ہلاک کیے گئے، جبکہ بعض آپریشنز میں اہم ٹھکانے بھی تباہ کیے گئے۔

علاوہ ازیں گزشتہ سال ایف سی، پولیس اور فوج کے اہلکاروں کو اغوا بھی کیا گیا تھا، تاہم بعد ازاں قبائلی عمائدین کے ساتھ مذاکرات کے نتیجے میں مغوی اہلکاروں کی بازیابی عمل میں آئی۔