ڈیرہ غازی خان میں پولیس نے پاکستانی طالبان کا بڑا دہشتگرد منصوبہ ناکام بنا دیا

ڈی جی خان (نمائندہ ڈیلی اردو) پاکستان کے صوبہ پنجاب کے ضلع ڈیرہ غازی خان میں پولیس نے کالعدم تحریک طالبان پاکستان (ٹی ٹی پی) کے دہشت گردوں کی جانب سے سیکیورٹی فورسز کو نشانہ بنانے کے لیے نصب کیے گئے دیسی ساختہ بم (آئی ای ڈی) کو ناکارہ بنا کر بڑا سانحہ ہونے سے بچا لیا۔

ڈی جی خان پولیس اسپیشل آپریشنز یونٹ (ایس او یو) اور ایلیٹ ٹیموں نے سرحدی علاقے جادے والی میں سرچ آپریشن کے دوران جادے والی قبرستان کے قریب نصب آئی ای ڈی برآمد کی۔ اسے ڈسپوزل اسکواڈ نے محفوظ طریقے سے ناکارہ بنایا۔

پولیس ترجمان کے مطابق خارجی دہشت گردوں کی جانب سے نصب کی گئی یہ آئی ای ڈی سیکیورٹی فورسز کو نشانہ بنانے کے لیے تھی، لیکن پولیس اور ایلیٹ ٹیموں کی بروقت کارروائی کے باعث علاقہ بڑے سانحے سے محفوظ رہا۔

ترجمان کے مطابق آئی جی پنجاب نے دہشت گردی کے منصوبے کو ناکام بنانے پر ڈیرہ غازی خان پولیس کو شاباش دی ہے۔