کالعدم تحریک طالبان پاکستان کا سوات میں مزید حملوں کا اعلان

سوات (ڈیلی اردو) کالعدم تنظیم تحریک طالبان پاکستان نے سوات کے مختلف علاقوں میں مزید حملے کرنے کا اعلان کردیا۔

باوثوق ذرائع کے مطابق تحریک طالبان پاکستان کا اجلاس صوبہ خیبر پختونخوا کے ضلع سوات کی تحصیل مٹہ کے علاقہ کنالہ میں منعقد ہوا جس میں 50 سے زائد شدت پسندوں نے شرکت کی۔

ذرائع کا کہنا ہے کہ اجلاس میں فیصلہ کیا گیا کہ پہلے مرحلے میں امن کمیٹی کے سابق ارکان کو نشانہ بنایا جائےگا، دوسرے مرحلے میں خوانین اور عوامی نیشنل پارٹی (اے این پی) کے رہنماؤں کو اور تیسرے مرحلے پولیس اور دیگر سیکورٹی فورسز کے اہلکاروں کو نشانہ بنایا جائے گا، اجلاس کو بتایا گیا کہ مختلف علاقوں میں تشکیل کئے گئے طالبان کے دستے پہنچ گئے ہیں۔