کراچی: ایک اور شیعہ سرکاری افسر قتل: ٹارگٹ کلر کے ڈی اے آفیسر کو گولیاں مار کر فرار

کراچی (نمائندہ ڈیلی اردو) شہر قائد میں ایک اور شیعہ سرکاری افسر دن دہاڑے قتل ہو گیا، پی ای سی ایچ سوسائٹی میں مسلح ملزمان نے چلتی ہوئی کار پر گولیاں برسا دیں، جس کے نتیجے میں کے ڈی اے کا شیعہ آفیسر سید محمد علی موقع پر ہی دم توڑ گیا۔

تفصیلات کے مطابق کراچی کے شہری ایک بار پھر ٹارگٹ کلرز کے نشانے پر آگئے، ناملوم موٹر سائیکل سواروں نے ایک اور سرکاری افسر کو دن دہاڑے شہید کردیا۔

کراچی کے پوش علاقے پی ای سی ایچ ایس بلاک ٹو میں نامعلوم مسلح افراد نے چلتی گاڑی پر گولیاں برسا دیں، گاڑی میں موجود کراچی ڈویلپمنٹ اتھارٹی ( کے ڈی اے) کا گریڈ پندرہ کا افسر سید محمد علی شاہ موقع پر ہی جان سے ہاتھ دھو بیٹھا۔
پولیس کو جائے وقوعہ سے تیس بور پستول کا ایک خول ملا ہے جبکہ مزید شواہد اکھٹے کیے جارہے ہیں۔

ملزمان کے فرار ہونے کی سی سی ٹی وی فوٹیج بھی سامنے آگئی، تاہم سی سی ٹی وی فوٹیج سے بھی موٹر سائیکل پر سوار ٹارگٹ کلرز کی شناخت ممکن نہ ہوسکی۔