کراچی: دو روز قبل گرفتار کالعدم تنظیم ایس آر اے کے 2 ارکان مقدمے سے بری

کراچی (ڈیلی اردو) صوبہ سندھ کے دارالحکومت کراچی کی مقامی عدالت نے دو روز قبل گرفتار کیے گئے کالعدم تنظیم سندھو دیش ریولوشنری آرمی (ایس آر اے) سے مبینہ طور پر وابستہ دو مشتبہ افراد کو دھماکا خیز مواد رکھنے کے مقدمے سے بری کر دیا۔

تفصیلات کے مطابق جوڈیشل مجسٹریٹ (غربی) نے اتوار کے روز سخت سیکیورٹی میں دونوں ملزمان — سرمد علی رضا اور غنی امان چانڈیو — کو پیشی کے بعد مقدمے سے بری کرنے کا حکم دیا۔

ریمانڈ پیپرز کے مطابق تفتیشی افسر (آئی او) نے بتایا کہ ملزمان کو محکمہ انسداد دہشت گردی (سی ٹی ڈی) نے کراچی کے علاقے مچھر کالونی میں خفیہ اطلاع پر مبنی کارروائی کے دوران گرفتار کیا تھا۔

آئی او کے مطابق کارروائی کے دوران ملزمان کے قبضے سے ایک دستی بم برآمد ہوا، جسے بعد ازاں بم ڈسپوزل اسکواڈ نے ناکارہ بنا دیا۔

انہوں نے کہا کہ دونوں ملزمان کا تعلق کالعدم ایس آر اے سے ہے اور ان کے ایک روزہ عبوری ریمانڈ کی درخواست دی گئی تاکہ انہیں انسدادِ دہشت گردی عدالت کے انتظامی جج کے سامنے پیش کیا جا سکے۔

دوسری جانب، وکیلِ دفاع ایڈووکیٹ حسیب پنہور نے ضابطہ فوجداری (سی آر پی سی) کی متعلقہ دفعات کے تحت ملزمان کی بریت کی درخواست دائر کی۔

انہوں نے عدالت میں مؤقف اختیار کیا کہ دونوں افراد کو جھوٹے اور بدنیتی پر مبنی الزامات کے تحت ملوث کیا گیا ہے۔

وکیل کے مطابق، قانون نافذ کرنے والے ادارے نے ملزمان کو پہلے ہی لاپتا رکھا ہوا تھا، بعد ازاں ان کی گرفتاری موجودہ مقدمے میں ظاہر کی گئی۔

ایڈووکیٹ پنہور نے عدالت میں سندھ ہائی کورٹ میں دائر آئینی درخواست کی نقول، متعلقہ حکام کو دی گئی درخواستیں اور کراچی بار ایسوسی ایشن کی قرارداد بھی پیش کی، جس میں ان کی گمشدگی پر تشویش ظاہر کی گئی تھی۔

دلائل سننے اور ریمانڈ پیپرز کا جائزہ لینے کے بعد عدالت نے دفاعی درخواست منظور کر لی اور ضابطہ فوجداری کی دفعہ 63 کے تحت دونوں ملزمان کو بری کرتے ہوئے تفتیشی افسر کو ہدایت کی کہ وہ مقررہ مدت میں چالان جمع کرائے۔

واضح رہے کہ ایک روز قبل سی ٹی ڈی نے دعویٰ کیا تھا کہ ملزمان کے خلاف انسداد دہشت گردی ایکٹ اور ایکسپلوسیو ایکٹ کی دفعات کے تحت دو مقدمات درج کیے گئے ہیں۔

ادارے نے یہ بھی الزام عائد کیا تھا کہ دونوں افراد کا مجرمانہ ریکارڈ موجود ہے اور وہ ماضی میں حیدرآباد، جامشورو اور لاڑکانہ میں درج پانچ دہشت گردی کے مقدمات میں ملوث رہے ہیں۔