کراچی: سینٹرل جیل سے فرار خطرناک دہشت گردوں کے کیس میں سابق سپریٹنڈنٹ جیل کو سزا

کراچی (ڈیلی اردو) انسداد دہشتگردی عدالت نے کراچی سینٹرل جیل سے خطرناک قیدیوں کے فرار کیس میں سابق اسسٹنٹ سپریٹنڈنٹ جیل سمیت چودہ ملزمان کو چھ چھ سال قید کی سزا سنادی ہے۔

تفصیلات کے مطابق کراچی کی انسداد دہشتگردی عدالت میں سینٹرل جیل سے خطرناک قیدیوں کے فرار سے متعلق کیس کی سماعت ہوئی۔

جہاں عدالت نے فیصلہ سناتے ہوئے اسسٹنٹ سپریٹنڈنٹ جیل غلام مرتضی، عبدالرحمان شیخ سمیت 14 ملزمان کو 6 ،6سال قید کی سزا سناتے ہوئے جرمانہ بھی عائد کردیا۔

دیگر مجرموں میں جیل افسران فہیم انور، سالک ایاز اور رفیق چنا سمیت چودہ مجرمان شامل تھے۔ یہ لوگ ضمانت پر رہا تھے اور فیصلہ آنے کے بعد پولیس نے انہیں گرفتار کرکے جیل بھیج دیا۔

واضح رہے کہ تیرہ جون 2017 کو سینٹرل جیل سے کالعدم تنظیم کے دو کارندے شیخ ممتاز عرف فرعون اور احمد خان عرف منا فرار ہوگئے تھے۔ رینجرز اور پولیس نے غفلت کے الزام میں جیل افسران کو گرفتار کرکے ان کے خلاف مقدمہ درج کیا تھا۔