کراچی سے ’را‘ کا تربیت یافتہ دہشت گرد گرفتار

کراچی (ڈیلی اردو) سندھ رینجرز نے کراچی کے علاقے لیاقت آباد سے ایم کیو ایم لندن کے بھارتی ایجنسی ’را‘ سے تربیت یافتہ دہشتگرد کو گرفتار کرلیا۔

ترجمان رینجرز کے مطابق لیاقت آباد میں پولیس کے ساتھ مشترکہ کارروائی میں ایم کیو ایم لندن کا انتہائی مطلوب دہشتگرد وسیم عرف باس عرف ٹنڈا گرفتار کرلیا۔

ترجمان نے بتایا کہ ملزم کے قبضے سے اسلحہ اور ایمیونیشن برآمد کر لیا گیا ہے، گرفتار ملزم بھتہ خور ایم کیو ایم لندن ف کے سیکٹر لیاقت آباد کا اہم کارکن رہا ہے، ملزم اور اس کے ساتھی بھارتی انٹیلی جنس ایجنسی ’را‘  سے بارودی مواد تیار کرنے، اسے استعمال کرنے اور ہتھیاروں کو چلانے کی تربیت حاصل کرچکے ہیں۔ 

ترجمان کے مطابق وسیم ٹنڈا ایم کیو ایم لندن کی ٹارگٹ کلنگ ٹیم چلاتا رہا ہے، ملزم ٹارگٹ کلنگ سمیت دہشتگردی کی متعدد وارداتوں میں ملوث رہا ہے، ملزم ایم کیو ایم لندن کی ایما پر نومبر 2013 تک متعدد وارداتیں کرچکا ہے جب کہ ملزم 2013 کے آپریشن میں گرفتاری سے بچنے کے لیے بیرون ملک فرار ہو گیا تھا۔