کراچی سے گرفتار دہشت گردوں کا ہدف سندھ اسمبلی تھا، ناصر حسین شاہ

کراچی (ڈیلی اردو) صوبہ سندھ کے صوبائی وزیر اطلاعات ناصر حسین شاہ نے انکشاف کیا ہے کہ کراچی کے علاقے شاہ لطیف ٹاؤن سے گرفتار کیے گئے دہشت گردوں کا ہدف سندھ اسمبلی تھا۔

ناصر حسین شاہ نے بتایا کہ سندھ اسمبلی کے گیٹ پر رکشے سے ایک دہشت گرد نے خودکش دھماکا کرنا تھا لیکن اسمبلی کا سیشن نہ ہونے کی وجہ سے حملہ نہیں کیا جاسکا۔

انہوں نے مزید بتایا کہ دہشت گردوں کے موبائل فون سے سندھ اسمبلی کی ویڈیو ملی ہے، دہشت گردوں کا افغانستان کے صوبے قندھار سے براہ راست رابطہ تھا اور گرفتار 3 دہشت گردوں کا تعلق قندھار جبکہ ایک کا ننگرہار سے ہے۔

خیال رہے کہ گزشتہ روز کراچی کے علاقے شاہ لطیف ٹاؤن میں کاؤنٹر ٹیررازم ڈپارٹمنٹ (سی ٹی ڈی) کے دہشت گردوں کے ساتھ مقابلے میں ایک ملزم ہلاک اور 5 کو گرفتار کر لیا گیا تھا۔

انچارج سی ٹی ڈی راجا عمر خطاب نے بتایا کہ شاہ لطیف ٹاؤن میں ایک عمارت میں دہشتگرد موجود تھے، خفیہ اطلاع پر دہشت گردوں کے خلاف کارروائی کی گئی۔

ڈی آئی جی سی ٹی ڈی عمر شاہد نے آپریشن کے بعد موقع پر موجود میڈیا سے گفتگو کے دوران آپریشن کی تفصیلات بتاتے ہوئے کہا کہ 6 دہشت گردوں کی موجودگی کی اطلاعات پر مکان پر چھاپہ مارا۔ فائرنگ کے تبادلے میں ایک دہشت گرد ہلاک ہو گیا جبکہ 5 دہشت گردوں کو گرفتار کر لیا گیا۔