کراچی میں اغوا برائے تاوان میں ملوث سی ٹی ڈی کے دو اہلکار گرفتار

کراچی (ڈیلی اردو) صوبہ سندھ کے صوبائی دارالحکومت کراچی میں اینٹی وائلنٹ کرائم سیل (اے وی سی سی) نے اغوا برائے تاوان کی واردات میں ملوث کاؤنٹر ٹیررازم ڈیپارٹمنٹ (سی ٹی ڈی) کے 2 اہلکاروں کو گرفتار کر کے نوکری سے برطرف کردیاگیا ہے۔

نجی ٹی وی چینل ڈان نیوز کے مطابق پولیس حکام کا کہنا تھا کہ سادہ لباس میں ملبوث ملزمان نے سی ٹی ڈی موبائل کا استعمال کرتے ہوئے کراچی کے علاقے محمود آباد میں قائم سافٹ ویئر ہاؤس سے شہری کو اغوا کیا اور اس کے آٹومیٹڈ ٹیلر مشین (اے ٹی ایم) سے 2 لاکھ 20 ہزار روپے نکالے۔

پولیس نے بتایا کہ ملزمان نے شہری سے مزید 10 لاکھ روپے کا تقاضا بھی کیا، جب کاؤنٹر ٹیررازم ڈیپارٹمنٹ کے اہلکار مزید 10 لاکھ روپے وصول کرنے آئے تو اینٹی وائلنٹ کرائم سیل (اے وی سی سی) کے اہلکاروں نے انہیں گرفتار کرلیا، ملزمان کے خلاف یاسر جاوید نامی شہری نے اغوا برائے تاوان کا مقدمہ درج کروایا تھا۔

بعد ازاں سی ٹی ڈی حکام نے ملزمان پر جرم ثابت ہونے کے بعد ان کو نوکری سے برطرف کردیا، پولیس کے مطابق واردات میں ملوث مزید 6 ملزمان کی گرفتاری کے لیے چھاپے مارے جارہے ہیں۔