کراچی میں دہشت گردوں کی فائرنگ سے سی ٹی ڈی کے ڈی ایس پی علی رضا ہلاک

کراچی (بیورو رپورٹ) صوبہ سندھ کے صوبائی حکومت کراچی دہشت گردوں کے حملے میں کاؤنٹر ٹیرارزم ڈپارٹمنٹ (سی ٹی ڈی) کے ڈی ایس پی ہلاک ہوگئے۔

تفصیلات کے مطابق کراچی کے علاقے کریم آباد کے قریب سی ٹی ڈی کے ڈپٹی سپرنٹنڈنٹ آف پولیس (ڈی ایس پی) سید علی رضا کو نامعلوم مسلح دہشت گردوں نے ٹارگٹ کلنگ کا نشانہ بنایا اور فرار ہوگئے۔

پولیس حکام کے مطابق موٹر سائیکل سوار نامعلوم دہشت گردوں نے ڈی ایس پی علی رضا کے سر میں گولی ماری جس سے وہ موقع پر ہی ہلاک ہو گئے جبکہ فائرنگ سے ایک گارڈ زخمی بھی ہوا۔

ڈی ایس پی علی رضا ایس ایس پی چوہدری اسلم کے قریبی ساتھی تھے۔

پولیس کے مطابق علی رضا کو دو ملزمان نے نشانہ بنایا، ایک نے اجرک اوڑھ رکھی تھی، حملہ آور دو ملزمان میں سے ایک نے ہیلمٹ پہنا ہوا تھا۔ علی رضا پر حملے کے مقام سے نائن ایم ایم پسٹل کی 11 گولیوں کے خول ملے ہیں۔

پولیس کی بھاری نفری جائے وقوعہ پر پہنچ گئی اور علاقے کو گھیرے میں لے کر شواہد جمع کیے جارہے ہیں۔

صوبائی وزیر داخلہ ضیاالحسن لنجار نے حملے میں ملوث عناصر کی گرفتاری کے لیے فوری اقدامات کی ہدایت کرتے ہوئے ڈی آئی جی سی ٹی ڈی اور ایس ایس پی سینٹرل سے رپورٹ طلب کرلی۔