کراچی پولیس ہیڈ آفس پر حملہ کرنے والے تینوں دہشت گردوں کی شناخت ہوگئی

کراچی (ڈیلی اردو) کراچی پولیس آفس پر حملہ کرنے والے تینوں دہشت گردوں کی شناخت ہوگئی ہے۔

جمعے کو کراچی کی شارع فیصل پر واقع کراچی پولیس آفس پر دہشت گروں کے حملے میں 2 پولیس اہلکاروں اور رینجرز افسر سمیت 4 افراد ہلاک ہوئے جبکہ پولیس اور قانون نافذ کرنے والے اداروں کی جوابی کارروائی میں 3 دہشت گرد مارے گئے اور عمارت کو تقریباً 4 گھنٹے بعدکلیئر کرالیا گیا۔

نجی ٹی وی چینل جیو نیوز سے گفتگو میں ڈپٹی انسپکٹر جنرل (ڈی آئی جی) ایسٹ مقدس حیدر نے بتایا کہ حملے میں 3 دہشت گرد ہلاک ہوئے، ایک دہشت گرد چوتھی منزل پر اور 2 چھت پر ہلاک ہوئے۔

انہوں نے بتایا کہ ہلاک دہشت گردوں میں سے ایک نے خود کو دھماکے سے اڑایا۔

ذرائع کے مطابق کراچی پولیس آفس پر حملہ کرنے والے تینوں دہشت گردوں کی شناخت ہوگئی ہے۔

ذرائع کا کہنا ہے کہ خودکش دھماکا کرنے والا دہشت گرد زالا نور قبائلی ضلع شمالی وزیر ستان سے تعلق رکھتا تھا جب کہ سکیورٹی فورسز سے مقابلے میں مارا گیا دہشت گرد کفایت اللہ ضلع لکی مروت کا رہائشی تھا۔

تیسرے دہشت گرد مجید کے بارے میں معلوم ہوا ہےکہ اس کا تعلق بھی شمالی وزیرستان کے علاقے دتہ خیل سے ہے۔

آدھر کراچی پولیس آفس حملے کی تحقیقات کے لیے 5 رکنی کمیٹی قائم کردی گئی۔

ڈی آئی جی ذوالفقار لاڑک کی سربراہی میں قائم کی گئی کمیٹی کی تشکیل کا نوٹیفکیشن بھی جاری کردیا گیا ہے۔

نوٹیفکیشن کے مطابق تحقیقاتی کمیٹی میں ڈی آئی جی ساؤتھ، ڈی آئی جی سی آئی اے، ایس ایس پی سی ٹی ڈی اور ڈی ایس پی سی ٹی ڈی بھی شامل ہوں گے۔