کرم: سنٹرل کُرم میں چیک پوسٹ پر دہشت گردوں کا حملہ، ایک ایف سی اہلکار ہلاک، دوسرا زخمی

اسلام آباد (ش ح ط) صوبہ خیبر پختونخوا کے قبائلی ضلع کرم میں دہشت گردوں کی فائرنگ سے سیکورٹی فورسز کا ایک اہلکار ہلاک اور دوسرا زخمی ہو گیا۔

تفصیلات کے مطابق وسطی کرم کے علاقے تودے اوبہ میں سیکیورٹی فورسز کے 112 وینگ کی چیک پوسٹ پر دہشت گردوں نے فائرنگ کردی جس کے نتیجے میں دیاب نامی ایف سی اہلکار ہلاک ہو گیا جبکہ دوسرا اہلکار شدید زخمی ہوا۔

ذرائع نے ڈیلی اردو کو بتایا کہ سکیورٹی فورسز اور مسلح دہشت گردوں کے درمیان فائرنگ کا تبادلہ بھی ہوا ہے اور فورسز کی جوابی کارروائی سے حملہ آور فرار ہو گئے۔
‎
ذرائع کا کہنا ہے کہ واقعے کے بعد سکیورٹی فورسز اور پولیس نے جائے وقوعہ اور اردگرد کے علاقوں میں سرچ آپریشن کا آغاز کردیا ہے۔

اس سے قبل 27 جولائی کو سنٹرل کُرم میں سرپاخ پولیس اسٹیشن پر دہشت گردوں کے حملے میں ایک ایف سی اہلکار ہلاک اور پانچ اہلکار زخمی ہوگئے تھے۔