کرم: سکیورٹی فورسز اور دہشت گردوں میں جھڑپ، خودکش حملہ آور ہلاک، 6 دہشت گرد زخمی

کرم (نمائندہ ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع کرم کے علاقے ڈوگر میں سکیورٹی فورسز اور دہشت گردوں کے درمیان فائرنگ کا تبادلہ ہوا، جس کے نتیجے میں ایک خودکش حملہ آور ہلاک جبکہ 6 دہشت گرد زخمی ہو گئے۔

سکیورٹی ذرائع کے مطابق ہلاک ہونے والے خودکش حملہ آور کی شناخت عبداللہ عرف ابابیل کے نام سے ہوئی ہے۔

ذرائع کا کہنا ہے کہ دہشت گردوں اور سکیورٹی فورسز کے درمیان جھڑپ کے دوران دہشت گردوں کو جانی نقصان اٹھانا پڑا، جبکہ زخمی ہونے والے دہشت گردوں کی تعداد 6 بتائی جا رہی ہے۔

واقعے کے بعد سکیورٹی فورسز نے علاقے کو گھیرے میں لے کر سرچ آپریشن شروع کر دیا ہے۔ حکام کے مطابق علاقے میں موجود ممکنہ دہشت گردوں کی تلاش جاری ہے اور آپریشن مکمل ہونے تک کارروائیاں جاری رہیں گی۔

سکیورٹی فورسز کا کہنا ہے کہ علاقے میں امن و امان برقرار رکھنے اور دہشت گرد عناصر کے خاتمے کے لیے کارروائیاں بلا تعطل جاری رکھی جائیں گی۔